Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 328 Hüküm no: 529 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Silistre sancakbeyi Mehmed Bey’in ölümü ve muhallefâtının Ali ve Arslan adlı oğullarına verilmesi Sebeb-i tahrîr-i hurûf oldur ki, Sipâhi oğlanları zümresinden Mehmed b. Hasan nâm kimesne Dîvân-ı âlî la-zâle mehbitan li’l-feyzi’l-bârîye hâzır olup emâcid-i mükerremeyn-i deftereyn katlarında ve hâlâ mahrûse-i İstanbul’da beytülmâl-i hâssa emîni olan Mustafa Çelebi b. Behmen ve kâtib olan Derviş Çelebi b. Lütfi mahzarlarında takrîr-i kelâm ve tâ‘bîr-i merâm edip bundan akdem Silistre sancağı beyi olup fevt oldukda muhallefâtından hâsıl olan filorisi bezzâzistânda emânet konuldukdan sonra sene 961’de Hızâne-i âmireye teslîm olunan Boğdan voyvodası oğlu Mehmed nâm kimesne fevt oldukda Arslan nâm sulbî oğlunu ve Muhsine nâm sagīre sulbiye kızını terk edip sagīre-i mezbûrenin babası mezbûr Mehmed Bey’den edip [alıp] Hızâne-i âmire’de olan sekiz yüz seksen dokuz bin altı yüz altmış bir akçe hissesini kabz olunmadan sagīre-i mezbûre fevt olup mezbûre sagīrenin vâlidesi Perihan nâm hâtunu tezevvüc edip mezbûre hâtundan olan sulbî oğlu Ali nâm sagīr, mezbûre Muhsine’nin li üm kız karındaşıdır hâlâ mezbûr oğlum Ali’ye mezbûr Muhsine’ye de irs-i şer‘î ile intikâl edip yüz kırk sekiz bin iki yüz yetmiş sekiz akçe hissesini hükm-i velâyetim ile taleb ederim deyû da‘vâ eyledikde ba‘de’s-suâl gıbbe’l-inkâr mezbûr müdde‘î isbât eylemek sadedinde iken mezbûr müteveffiyenin ma‘rûfu’n-neseb mezbûr Arslan nâm oğlu hâzır olup mezbûre Ali’nin verâsetine itirâf edip mûcebiyle hükm olunup pâye-i serîr-i a‘lâya arz olundukda verilmek fermân olunup mâ vaka‘a bi’t-taleb kayd olundu. Fî evâili Rebî‘ilâhir sene 971.