Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 63 Hüküm no: 17 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Subaşı tarafından kabz edilen evin Mustafa Çavuş b. Abdullah tarafından talep edilmesi Vech-i tahrîr-i sicil oldur ki Havâss-ı Kostantiniyye[ye] tâbi‘ Beşiktaş’da sâkin olan fahrü’l-akrân Mustafa Çavuş b. Abdullah yava beytü’l-mâlci olan Ali Subaşı meclis-i şer‘a ihzâr edip ve mahzarında şöyle da‘vâ eyledi ki işbu fevt olan Mihal v. Yo[r]gi’nin Kuruçeşme’de vâki‘ olan mülk evi ki hudûdu bir taraf deryâ ile bir taraf nehir ile bir taraf Arslan yeri ile bir taraf Midilli mülk[ü] ile mahdûd bir bâb evini bey‘-i bât ile aldım, imdi mezbûr fevt olmak ile yava beytü’l-mâlci zâbit olan Ali Subaşı hâliyâ kabz eyledi hakkımdır taleb ederim deyicek mezbûr Ali Subaşı inkâr ile cevâb vericek merkūm çavuş da‘vâsına mutâbık beyyine lâzım oldukda udûl-i müslimînden ve sikāt-ı muvahhidînden İbrahim b. Sadık ve İbrahim b. Hoca da‘vâsına mutâbık ve muvâfık şehâdet-i şer‘iyye ettik[de] ba‘de’t-ta‘dîli’ş-şer‘î ve’t-tahlîfi’l-âdî ve’t-tezkiye şehâdetleri hayyiz-i kabûlde vâki‘ olup mâ vaka‘a bi’t-taleb kayd olundu. Cerâ zâlike ve hurrire fî evâil-i Rebî‘ülâhir sene 966 Şuhûdü’l-hâl: Mevlânâ Şehabeddin b. Mehmed, Mevlânâ Muslihiddin b. Üveys, Mehmed Çelebi b. Ali ve Mehmed b. Mustafa ve gayruhüm.