Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 81 Hüküm no: 82 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi b. Ali’nin evlerini Pîrî Ağa’ya sattığı Kaziyye-i Pîrî Ağa dış hazînedârbaşı Sebeb-i tahrîr-i kitâb ve mûcib-i tastîr-i hitâb-ı mer‘î oldur ki Havâss-ı Kostantıniyye-i mahmiyyeye tâbi‘ Beşiktaşı nâm karyeden Abdi b. Ali nâm kimesne meclis-i şer‘-i şerîfe hâzır oldukda ikrâr kılıp karye-i mezkûre mahallâtından mahalle-i Ekmekçibaşı’nda bir taraf tarîk-ı âmla ve bir taraf Kalender Çelebi mülküyle ve bir cânib Şeş-engüşt ile ve imâm ile müezzine meşrût vakıf evleriyle mahdûd iki yer evini ve bir çardak etrâfında sofa ile ve içeride ve taşrada iki pınar ve çardak ile ve fırın ve kenîf ve musluk ile ve kümes ile Alhane? ardında bir yer evimi dahi işbu bâ‘isü’l-kitâb mefharü’l-akrân dış hazînedârbaşı olan Pîrî Ağa hazretlerine on beş bin üç yüz akçeye bey‘ edip teslîm-i mebî‘ kabz-ı semen ettim deyicek mukırr-ı mezkûrun ikrâr[ını] mukarrun-lehü’l-mezbûr Piri Ağa vicâhen ve şifâhen tasdîk edip tarafeynden olan bey‘ ü şirânın sıhhatine hükm olunup bu müstekarrun-leh sebîl-i temessük yedine def‘ olundu ki vakt-i hâcette ihticâc edine. Cerâ zâlike ve hurrire fî evâhir-i Zilka‘de sene 966 Şuhûdü’l-hâl: Cafer b. Mehmed el-İmâm, Üstâd Veli b. Ömer, Mehmed b. Ali es-sipâhî, Hacı Mansur b. Ramazan, Ferhad b. Abdullah ve gayruhüm. Mâh-ı Zilhicce sene 966