Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 86 Hüküm no: 95 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil bt. Yasef’in Beşiktaş’taki evini Yani’ye sattığı Havâss-ı Kostantıniyye’ye tâbi‘ nâhiye-i İstinye muzâfâtından karye-i Büyükdere’de Vasil bt. Yasef nâm zimmiyye meclis-i şer‘-i şerîfe ve mahfil-i hükm-i münîfe hâzır[a] olduğunda bi’t-tav‘ ikrâr kılıp mahrûse-i mezbûreye tâbi‘ Beşiktaşı nâm karyeye tâbi‘ hudûd-ı erba‘ası ki iki taraf müşterî mülküyle ve iki yanı tarîk-i âmmla mahdûd bir yer evi sundurmasıyla ve karye-i mezbûrda bağlarında bir taraf Kriko Apostopulo ve bir taraf Kaloyani ve bir taraf müşterî-i mezbûr ve bir taraf Kalayani mülkiyle mahdûd mülkümü işbu sâhibü’l-kitâb Yani nâm zimmîye beş bin beş yüz akçeye bey‘-i bâtla bey‘ edip teslîm-i mebî‘ kabz-ı semen ettim deyicek bi’l-mukābele tasdîk olunup sicile kayd olundu. Fi’t-târîhi’l-mezbûr Şuhûdü’l-hâl: Mahmud b. Abdullah, İskender b. Abdullah, Sinan Subaşı, Nasuh Bey b. Abdullah.