Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 89 Hüküm no: 106 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır Kadısı Hasan Beyefendi’ye ait olan bahçenin vekili tarafından kiraya verildiği Vech-i tahrîr-i sicil budur ki Hâliyâ Mısır kādısı Mevlânâ ve min külli’l-vücûh evlânâ olan Hasan Efendi cânibinden vekâleti sâbit olan Hacı Murad b. Abdullah nâm kimesne meclis-i şer‘-i şerîfe hâzır oldukda karye-i Ayafuka’da inde’l-ahâleti’l-karye ma‘lûmü’l-hudûd olan bahçeyi iki sâbıkâ bin altışar yüz akçe mukāta‘aya verile gelmişdir hâliyâ dolab ve evleri harmanıyla yürümek şartıyla geri bin altı yüz akçeye işbu bâ‘isü’l-kitâb Mehmed b. Abdullah nâm kimesneye vekâletim tarîkiyle üç yıla mukāta‘aya verdim deyu ikrâr edicek mezkûr Mehmed’i dahi bi’l-müvâcehe tasdîk edip bi’t-taleb sicile kayd olundu. Tahrîren fî 18 Zilhicce min şuhûr sene sitte ve sittîn ve tis‘a mi’e. Mezkûr bahçeyi mezbûr Mehmed b. Abdullah nâm kimesne ile Hasan Beyefendi âdemi Ferruh Nakkâş Abdullah ile mukāta‘ayı fesh edip seksen altı gün zabt ettiği hesâb olundu ma‘lûm ola. Şuhûdü’l-hâl: Mehmed Usta ve Ahmed Usta ve Cafer b. Abdullah ve Cafer b. Sırrı ve Ferhad b. Abdullah ve gayruhüm mine’l-hâzırîn.