Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 117 Hüküm no: 173 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Siranci v. Nikola’nın Yani v. Yorgi’ye sattığı koyunların bedelini aldığı Gurre-i Rebî‘lüâhir sene 967 Yevmü’s-sebt fî 1 Yevmü’l-ehad fî 2 Vech-i tahrîr-i hurûf budur ki Gelibolu kazâsına tâbi‘ Bolayır nâm kasabadan Siranci v. Nikola nâm zimmî meclis-i şer‘-i şerîfe hâzır olup Havâss-ı Kostantıniyye’ye tâbi‘ Beşiktaşı nâm karyede mütemekkin Yani v. Yorgi nâm zimmî mahzarında ikrâr-ı şer‘i ve i‘tirâf-ı mer‘î kılıp dedi ki bundan akdem işbu Yani’ye yüz otuz beş re’s koyun otuz beş akçeye cem‘an dört bin yedi yüz yetmiş beş akçe olup meblağ-ı mezkûrdan iki bin üç yüz altmışını mukaddemâ alıp kabûl-i kabz etmiş idim bâkî iki bin dört yüz on beş akçe kalmış idi hâliyâ iki bin akçeyi dahi işbu bâ‘isü’s-sicil Yani elinden alıp kabûl-i kabz edip dört yüz on beş akçeden ferâgat edip cemî‘ duyûndan zimmetini ibrâ ve ıskāt ettim ba‘de’l-yevm bir vecihle da‘vâm ve nizâ‘ım yokdur dedikde mukırr-ı mezbûrun ikrârını ve kabûl-i meşrûhunu mezbûr vicâhen kabûl ve tasdîk edip talebiyle sebt-i sicil olundu. Tahrîren fi’s-sânî min şehr-i Rebî‘ülâhir sene 967 Şühûdü’l-hâl: Mehmed b. Mustafa el-muhzır, Papas Dimitri v. Yani, Todora v. Manol, Andreya v. Manol ve gayruhüm mine’l-hâzırîn.