Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 120 Hüküm no: 180 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beşiktaşı câmi-i şerîfi etrafındaki meyhânelerin kapattırılmasının Haslar kadısına emredildiği Sûret-i hükm-i şerîf Meyhâneler husûsu için vârid olan hükm-i şerîf Akdâ kudâti’l-müslimîn evlâ vülâti’l-muvahhidîn ma‘denü’l-fazli ve’l-kelâm Mevlânâ Haslar kādısı dâme fazlühü tevkī‘-i refi‘-i hümâyûn vâsıl olıcak ma‘lûm ola ki: Bâb-ı sa‘âdetime mektûb gönderip hükm-i şerîf vârid olup kasaba-i Beşiktaşı câmi‘-i şerîfi kurbünde ba‘zı kefere meyhâneler ihdâs edip fısk u fücûr olup fesâddan hâlî olmadığı ecilden zikr olunan meyhâneler ref‘ olunması fermân olunmağın mahall-i mezbûra varılıp a‘yân-ı müslimînden suâl olundukda fi’l-vâki‘ câmi‘-i mezbûrun etrâfında meyhâneler ihdâs olunmağın fısk u fücûr ve fesâd olur deyu acz izhâr edip emr-i şerîf muktezâsınca zikr olunan meyhânelerin ref‘ olunması tenbîh ve te’kîd olundukdan sonra mahall-i mezbûrda meyhâne olmayıp hamr bey‘ olunmamasına Papas Dimitri ve Pavli v. Yorgi ve Andreya v. Manol ve Anton v. Lenarda ve Panayorgi ve tüccâr Luiza ve Andreya Küçük ve Dimitri v. Yovan ve Garamiko nâm on zimmî mültezim oldukların bildirip kaziyye arz eylediğin gibi ise ol mahalden meyhâneleri ref‘ ettirip şer‘-i şerîfe muhâlefet iş ettirmeyesin şöyle bilesin alâmet-i şerîfe i‘timâd kılasın. Tahrîren fî evâsıt-ı Rebî‘i’l-evvel sene selâse ve sittîn ve tis‘a mi’e Be-makâm-ı Kostantıniyye el-mahrûse.