Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 134 Hüküm no: 216 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahhuban Hanım’ın kendisine ve çocuklarına ölen kocasından intikal eden ev hissesini Pîrî Efendi b. Ahmed’e sattığı Yevmü’l-erbi‘â, fî 11 Vech-i tahrîr-i sicil oldur ki Merhûm ve mağfûrun-leh Hayreddin Paşa’nın türbe-i şerîfine sâbıkā türbedâr olup vefât eden Ahmed b. Hasan eytâ[m]-ı sıgārına müteveffâ-yı mezkûrun zevcesi Şahhuban bt. Mehmed kıbel-i şer‘den vasî nasb olundukdan sonra merhûm Hayreddin Paşa [medresesi] müderrisi mefâhiru’l-ulemâ ve’l-fudalâdan Pîrî Efendi b. Ahmed âdemi Hürrem Bey b. Abdullah mahzarında ikrâr-ı şer‘î ve i‘tirâf-ı mer‘î kılıp zevcim müteveffâ-yı mezkûrun muhallefâtından türbe kurbünde vâki‘ olan ma‘lûmü’l-hudûd evden hissesini on tâne el-veznü’t-[tâm] filori kendi nefsimin asîl ve eytâm-ı sıgārının vasîsi kıbelinden bî-kusûr merkūm filori işbu bâ‘isü hâze’l-hurûf Hürrem Bey’den alıp kabûl [ve] kabz etdim ba‘de’l-yevm da‘vâm ve nizâ‘ım yokdur dedikde mukırre-i mezbûrenin ikrâr ve takrîr-i merâmını mezbûr Hürrem Bey vicâhen kabûl ve tasdîk edip mâ vaka‘a bi’t-taleb kayd olundu. Şuhûd: İsmail Çelebi b. Hayreddin, Kubad Bey b. Kasım, Pîrî Çelebi b. Ahmed, Ali b. Abdullah, İhtiyâr Çavuş, Mesih Bey b. Abdullah, Mehmed b. Mustafa el-muhzır, Hüsam b. Nebî el-muhzır ve gayruhüm mine’l-hâzırîn.