Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 154 Hüküm no: 260 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beşiktaş kasabası ve Ayafoka köyünden bazı zimmilerin Hamza b. Mehmed ve Mahmud b. Abdullah’ı bir yıllığına bağlarının koruculuğuna kabul ettikleri Kasaba-i Beşiktaşı keferesi ile Ayafoka ittifâkı ile olan budur. Vech-i tahrîr-i hurûf oldur ki Beşiktaş keferesinden Papas Dimitri b. Yani ve Papas Nikola b. Yako ve karye-i Ayafoka keferesinden Kocadervendci Dimitri b. İlya ve Aleksi b. Kosta ve Nikola b. Yorgi ve Yorgi b. Yani ve Andreya b. İstiyako ve Kosta b. Nikola ve Koca Yovan b. Rado ve Komyones b. Marko Dimitri nâm zimmîler meclis-i şer‘a hâzırûn olup Hamza b. Mehmed ve Mahmud b. Abdullah nâm kimesneler mahzarında ikrâr ve takrîr-i kelâm edip işbu mezbûrân Hamza ve Mahmud nâm kimesneler sâbıkdan bâğlarımız korucuları tâm tamâm müretteb bâğlarımızı hıfz ü hirâset etmişlerdi hâliyâ dahi sâbıkdan olan âdet-i kadîmimiz üzere mezbûrlar bâğlarımızı korumak için cümlemiz koruculuğa târih-i sicilden sene tamâmına varınca hıfz ü hirâset için kabûl etdik dediklerinde mezbûrların ikrâr ve kavl-i meşrûhunu mezbûrân korucular vicâhen kabûl ve tasdîk edip mâ vaka‘a bi’t-taleb kayd-ı sicil olundu. Tahrîren fî evâili Cemâziyelâhir sene 967. Şuhûd: İsmail Çelebi b. Hayreddin.