Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 157 Hüküm no: 270 Orijinal metin no: [33a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri Ahmed b. Abdullah’ın bazı eşyalarının hizmetçisi Ayşe bt. Abdullah tarafından alındığı Yevmü’s-sebt, fî 11 Vech-i tahrîr-i sicil oldur ki Beşiktaşı’nda sâkin Yeniçeri Ahmed b. Abdullah orfanası Âişe bt. Abdullah mahfil-i şer‘a ihzâr ve mahzarında takrîr-i da‘vâ edip işbu mezbûre Âişe evimden bir müzehheb dikme arakçın bir siyah dikme çenber bir ak bürüncek gömlek iki ak gömlek bir tuman mezkûr esbâbı fuzûlî alıp gitdi hâliyâ taleb ederim deyicek gıbbe’s-suâl mezbûre Âişe bi’t-tav‘ ve’r-rızâ ikrâr-ı merâmla cevâb verip mezkûr esbâb Ayas Paşa bahçesini zabt eden Hâcı Ramazan b. Hâcı Abdullah evinde sâbıkā hizmet itmişdim hâliyâ varıp bir gece konuk olup mezkûr esbâbı mezkûr Hâcı Ramazan’ın hatunu Kamer’e verip teslîm etdim dedikde mukırre-i mezbûrenin ikrârı mezbûr Ahmed Yeniçeri talebiyle kayd-ı sicil olundu. Tahrîren fi’l-yevmi’l-hâdî aşer min şehri Cumâdelâhire sene 967. Şuhûd: İsmail Çelebi b. Hayreddin, Şaban b. Yusuf er-râcil, Hasan b. Abdullah el-berber, Yusuf b. Ali, İbrahim b. Hayreddin, Mehmed Çelebi b. Şaban er-râcil, Hüsam b. Nebî el-muhzır, Mehmed b. Mustafa el-muhzır ve gayruhüm mine’l-hâzırîn.