Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 164 Hüküm no: 289 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta b. Dimitri’nin alacak hususunda Yani b. Kosta’nın zimmetini ibrâ ettiği Vech-i tahrîr-i hurûf oldur ki Beşiktaşı’ndan Yani b. Kosta nâm zimmî ile Ayafoka nâm karyeden Kosta b. Dimitri nâm zimmî mahfil-i şer‘-i şerîfe hâzırân olup tarafeynden ikrâr-ı şer‘î ve i‘tirâf-ı mer‘î kılıp mezbûr Kosta takrîr-i cevâb edip; bundan akdem Beşiktaşı bâğlarında ma‘lûmü’l-hudûd olan bâğı işbu Yani <> müstahak hakkım elimden aldıkda mezkûr bâğının kıymetinden beş yüz akçe, bâğ mahsûlünden bunun hakkı zimmetinde olup benim dahi işbu mezbûr Yani zimmetinde altı yüz akçe hakkım zâhir ve sâbit olup beş yüz akçe mukābilesinde ivaz olup yüz akçe fazlasın işbu Yani elinden alıp kabûl [ve] kabz etdim elân makbûzumdur bâkī hukukdan tarafeynden zimmetimizi ibrâ ve ıskāt etdik dedikde mukarr-ı mezbûr Yani vicâhen mezbûr Kosta’nın ikrâr ve kavl-i meşrûhunu kezâlik kabûl ve tasdîk edip mâ vaka‘a bi’t-taleb kayd-ı sicil olundukdan sonra ber-sebîl-i temessük taleb olunup mâ vaka‘a tahrîr olunup yedlerine verildi. Şuhûd: İsmail Çelebi b. Hayreddin, Hüsam b. Nebî el-muhzır, Mehmed b. Mustafa el-muhzır, Komyones b. Marko, Koca Yovan b. Yorgi, Andreya b. İstiyako, Aleksi b. Mosta, Mihal b. Manol, Luka b. Kosta, Lipoza b. Yani, Manol b. Andreya, Yani b. Yorgi ve gayruhüm mine’l-hâzırîn.