Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 170 Hüküm no: 305 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Cündî Hüseyinzâde Vakfı’na ait Kâğıthane’deki çayır ve değirmenlerin üç yıllığına Yorgi b. Yani ile Yorgi b. Yorgi’ye kiraya verildiği Kaziyye-i Cündî Hüseyinzâde Mehmed Çelebi defterdâr-ı Haleb Vech-i tahrîr-i hurûf oldur ki Kıdvetü’l-emâsil ve’l-emâcid Mehmed Çelebi b. Cündî Hüseyinzâde Evkāfı’na bi’l-fi‘il mütevellî kāimmakāmı olan Yahya b. İskender mahfil-i şer‘-i şerîfe hâzır olup Yorgi b. Yani ve diğer Yorgi b. Yorgi nâm Nasrânîler mahzarında ikrâr-ı şer‘î ve i‘tirâf-ı mer‘î kılıp ve diğer havâss-ı Kostantınıyye tevâbi‘i Kağıdhane suyunda dâir ve deverân eden dört göz değirmen önünde olan bir kıt‘a çayır ile ve yukarı cânibde olan üç göz değirmenin nısf-ı şâyi‘inin ve önünde olan çayır ile mezbûrân değirmenleri ve iki kıt‘a çayır ile târih-i sicilden üç yıl tamâmına varınca otuz bir bin akçe icâreye işbu bâ‘isânü hâze’s-sicil mezbûrân Yorgiyân’a verdim şol kavl üzere ki her ayda iki bin beş yüz seksen akçe vermek ahdi üzere verip teslîm etdiğimden sonra meblağ-ı mezkûrun derkine Beşiktaş’dan Büyük Andreya b. Manol nâm Nasrânî kefîl bi’l-mâl aldım deyicek mukırr-ı mezbûrun ikrârı ve kavl-i meşrûhu üzere mezbûr Büyük Andreya kefâlet-i mezkûreyi dahi vicâhen kabûl edip ve mezbûrân Yorgiyân dahi mukırr-ı mezbûrun ikrârı ve kavl-i meşrûhunu vicâhen kabûl ve tasdîk edip mâ vaka‘a bi’t-taleb kayd-ı sicil olundu. Tahrîren fî gurreti Rebî‘ülevvel sene 967. Şuhûd: İsmail Çelebi b. Hayreddin, Hamza b. Abdullah er-râcil, Hamza b. Hasan, Mustafa b. Abdullah, Ahmed b. Mahmud, Ahmed Çelebi b. ( ), Hüsam b. Nebî el-muhzır ve gayruhüm mine’l-hâzırîn.