Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 186 Hüküm no: 347 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi hatunun kaçan kölesinin, İlyas b. Abdullah ile Yeniçeri Hamza tarafından yakalandıktan sonra tekrar kaçtığı Vech-i tahrîr-i sicil oldur ki Kuruçeşme’de sâkine Yahudi hatununa hâliyâ hizmetde Mustafa Yeniçeri b. Abdullah, İlyas b. Abdullah nâm acemi oğlanını mahfil-i şer‘a ihzâr edip üzerine takrîr edip bundan akdem Yahudi hatununun Frengi bir esîr[i] ibâkat edip işbu İlyas mezkûr âbıkını esîr dutup zabt etmişdir hâliyâ taleb ederim deyicek gıbbe’s-suâl mezbûr İlyas an-tav‘in ikrâr ile cevâb verip mezkûr esîr[i] bâğlar içinde Hamza nâm acemi oğlanı ile dutup eve getirdik idi ben esîri bağladım sonra mezkûr Hamza esîr[i] irsâl edip gece üçümüz evde yatar iken mezkûr esîr ibâkat etdi dedikde mukırr-ı mezbûrun ikrâr[ı] mezbûr Mustafa Yeniçeri talebiyle kayd olundu. Şuhûd: Behram Bey b. Abdullah, Şaban b. Yusuf, Hüsam b. Nebî el-muhzır, Mehmed b. Mustafa ve gayruhüm mine’l-hâzırîn.