Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 215 Hüküm no: 419 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Reisler Frankol b. Yani ve Kiryakoz b. Todorze’nin kefaletinden dolayı Yaşmakçı Kosta b. Yani’den 1.480 akçe alacakları olduğu Yevmü’l-hamîs, fî 5 Vech-i tahrîr-i sicil oldur ki Frankol b. Yani ve Kiryakoz b. Todorze nâm reisler Beşiktaş keferesinden Kosta b. Yani nâm yaşmakçı zimmî[yi] mahfil-i şer‘a ihzâr edip üzerine takrîr-i da‘vâ bundan akdem Mustafa Çelebi b. Ali nâm fırınını icâre ile dutan Yorgi b. Yani nâm habbâza dört müd buğday her bir kilesi on sekizer buçuk akçeye cem‘an bin dört yüz seksen akçe olur hâliyâ mezkûr Yorgi habbâz hâzır olmadığı ecilden işbu Kosta nefsine ve mâlına mezkûr Yorgi’nin kefîldir hakkımız mezbûrdan taleb ederim deyicek gıbbe’s-suâl mezbûr Kosta inkâr ile cevâb vericek da‘vâlarına mutâbık beyyine taleb olundukda Mahmud Bey b. Abdullah ve Todora b. Yorgi Dîvâne İskender mezbûrların da‘vâsına mutâbık edâ-i şehâdet-i şer‘iyye edip işbu Kosta mezkûr Yorgi’nin mâlına ve nefsine kefîl olmuşdur şâhidleriz şehâdet dahi ederiz dediklerinde mezbûrların şehâdetleri hayyiz-i kabûlde vâki‘ olup mâ vaka‘a bi’t-taleb kayd olundu. Şuhûd: Ferruh b. Abdullah, Mehmed b. Mustafa el-muhzır.