Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 222 Hüküm no: 436 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Duka’nın yaptığı evin bitişiğindeki Manol v. Nikola’nın evine zarar verdiğinden dolayı duvar aralarının dört parmak açılması gerektiği Vech-i tahrîr-i sicil oldur ki Hâslar kazâsına tâbi‘ Akındıburnu nâm karyeden Manol v. Nikola mahfil-i şer‘a geldikde takrîr-i kelâm edip karye-i mezbûreden Nikola v. Duka hâliyâ binâ etdiği evinin duvarı kadîmden benim evim duvarına muttasıl olup benim [sa]çağım ve damlalığıma ve duvarıma ziyâde zarar etmişdir mahall-i nizâ‘ın üzerine varılıp mezkûr zararın def‘ olunmasını taleb ederim deyicek hâssa mi‘mârlarından Mi‘mârbaşı Sinan Ağa ma‘rifetiyle Üstâd Kasım ile üzerine varıldıkda mezkûr sâhib-i binâ Nikola ve ehl-i karye ile mahall-i nizâ‘ın üzerine ihzâr olundukda vâkı‘â mezbûr Nikola’nın hâliyâ binâ etdiği evinin duvarı mezbûr Manol’un kadîmden olan evinin duvarına muttasıl olup mezbûr Manol’un [sa]çağı damlasına ve duvarına zararı inde’l-ahâlî ma‘lûm oldukda mezbûr Üstâd Kasım iki duvarın mâbeyni dörder parmak mikdârı fâsıla lâzımdır deyu ta‘yîn etdikde mâ-hüve’l-vâkı‘ mezbûr Manol talebiyle sebt-i sicil olundu. Tahrîren fi’l-yevmi’s-sâmin aşer min şehri Ramazâni’l-mübârek li-sene 967. Şühud: Ferruh b. Abdullah, İbrahim Subaşı b. Ali, Mehmed b. Ali, Mehmed b. Mustafa el-muhzır, Dimitri b. Pavli, İstemad b. Nikola kethüdâ, Yorgi b. Nikola et-neccâr, Dimitri b. Yorgi, Simo b. Yani ve gayruhüm mine’l-hâzırîn.