Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 229 Hüküm no: 452 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâfız Mehmed Çelebi b. Mehmed’in şiddetli geçimsizlik sebebiyle karısı Zülfi bt. Abdullah’tan boşandığı Yevmü’l-hamîs, fî 3 Vech-i tahrîr-i hurûf oldur ki Beşiktaşı’ndan Hâfız Mehmed Çelebi b. Mehmed hâliyâ zevcesi Zülfi bt. Abdullah nâm hatun ile hüsn-i zindegânları olmayıp mâbeynlerinde münâza‘a-i şedîde vâki‘ oldukda meclis-i şer‘-i şerîfe hâzırân olup mezbûre Zülfi ikrâr ve takrîr-i kelâm edip işbu hâmilü hâze’l-kitâb zevcim Mehmed Çelebi zimmetinde olan bin beş yüz akçe mehr-i mü’eccelimden ve iddet-i nafakamdan ve eğer benden veled gelirse nafakasını teslîm ve sâir hukukumdan her ne ise bi’l-külliye ferâğat etdim bu şart üzere talâk versin dedikde mukırre-i mezbûrenin ikrârı ve kavl-i meşrûhunu mezbûr Mehmed kabûl ve tasdîk edip meclis-i şer‘de bâyin talâk verip fasl-ı husûmet ve kat‘-ı nizâ‘ olunduğu bi’t-taleb kayd olundu. Tahrîren fî evâili Şevvâli’l-mükerrem li-sene seb‘a ve sittîn ve tis‘a mi’e. Şuhûd: Mevlânâ Mehmed b. Veli el-imâm, Cafer b. Pir Mehmed el-mu‘allim, Mehmed Usta, Mustafa Çavuş, Nebî b. Hızır el-kâtib, Nasûh Bey b. Abdullah, Bâli b. Abdullah el-hammâmî, Mehmed b. Abdullah ve gayruhüm mine’l-hâzırîn.