Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 231 Hüküm no: 458 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mendal b. Gora’nın alacağını ödemek üzere Todora b. Diçko ve Yani b. Manol’a on beş gün süre verdiği ve borçlulara Komyones b. Marko’nun kefil olduğu Yevmü’s-sebt, fî 12 Vech-i tahrîr-i sicil budur ki Ayafoka nâm karyeden Mendal b. Gora nâm Nasrânî Akındıburnu nâm karyeden Todora b. Diçko ve Yani b. Manol Nasrânîleri mahfil-i şer‘-i şerîfe ihzâr ve üzerlerine takrîr-i da‘vâ edip bundan akdem işbu mezbûrân Todora ve Yani’ye iki yüz yirmi tâne filori karz-ı hasen vermişdim hâliyâ mezbûrlardan meblağ-ı mezkûru taleb ederim dedikde gıbbe’s-suâl mezbûrân Todora ve Yani an-tav‘in ikrâr-ı merâmla cevâb verdiklerinden sonra mezbûrlar mezbûr Mendal’den on beş gün mehil taleb etdiklerinden sonra on beş [gün] mezbûr Mendal mehil verip meblağ-ı mezkûr Ayafoka’dan Komyones b. Marko kefîl bi’l-mâl olup mezbûr [Komyones b.] Marko vicâhen kefâlet-i mezbûreyi kabûl ve tasdîk edip mâ vaka‘a mezbûr Mendal talebiyle kayd olundu. Tahrîren fi’l-yevmi’s-sânî aşer min şehri Şevvâli’l-mükerrem sene 967. Şuhûd: Ferruh b. Abdullah, Mehmed b. Mustafa el-muhzır, Kasım b. Abdullah, Andreya b. İstirko, Kostantin b. Avizer ve gayruhüm mine’l-hâzırîn.