Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 232 Hüküm no: 460 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andreya v. Manol ve oğlu Yani’nin kendilerini dövdükleri iddiasıyla yeniçeri Mustafa ve Ahmed aleyhine açtıkları davada tarafların birbirlerinden şikâyet ettikleri Yevmü’l-ehad, fî 13 Vech-i tahrîr-i sicil budur ki Kasaba-i Beşiktaş keferesinden Andreya v. Manol ve oğlu Yani nâm zimmîler Yeniçeri Mustafa b. Abdullah ve Ahmed Yeniçeri b. Abdullah nâm kimesneler ile mahfil-i şer‘-i şerîfe hâzırûn olduklarından sonra mezbûr Yani takrîr-i da‘vâ edip işbu müşârun-ileyhimâ yeniçeriler gelip evimden fıçımdan hamrımızı almak istediklerinde ben dahi hamr vermediğim için babamla beni muhkem darb-ı şedîd edip mezbûr Mustafa bıçakla sol uyluğumdan beni urup mecrûh etdi hakkımı taleb ederim deyicek gıbbe’s-suâl mezbûr Mustafa an-tav‘in ikrâr-ı merâmla cevâb verip dedi ki işbu Yani bize akçemiz ile hamr istedik vermedi öyle oluysa fıçıdan hamrı almak istediğimizde inâd edip bu kâfirler bizi muhkem darb eder iken ben dahi bıçak ile nâ-çâr olup urdum dedikde gıbbe’s-suâl mezbûr kâfirler inkâr ile cevâb verip min ba‘d biz bunları urmadık deyicek mâ vaka‘a bi’t-taleb kayd olundu. Tahrîren fî evâili Şevvâli’l-mükerrem sene 967. Şuhûdü’l-hâl: Ahmed Çelebi b. Kasım, Hasan b. Abdullah el-berber, Murad b. Abdullah, Mahmud b. Abdullah, Mehmed b. Abdullah, Ramazan b. Mahmud, Said b. Ahmed, Kulfal b. Hasan, Mehmed b. Mustafa el-muhzır, Mehmed b. Abdullah ve gayruhüm mine’l-hâzırîn.