Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 236 Hüküm no: 471 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferahşad bt. Abdullah’ın eski kocası Mehmed Çelebi b. Pîrî’den mehir ve nafaka parasını almadığına yemin ettiği Yevmü’l-hamîs, fî 23 Vech-i tahrîr-i sicil oldur ki Beşiktaşı’ndan Ferahşad bt. Abdullah nâm hatun sâbıkā zevci olan Mehmed Çelebi b. Pîrî nâm kimesneyi mahfil-i şer‘-i şerîfe ihzâr ve üzerine takrîr-i da‘vâ edip bundan akdem zevcesi olup bana talâk vermişdir hâliyâ mehr-i mü’eccelim ve iddet-i nafakam ve sagīre kızı Emeti nafakasın taleb ederim deyicek gıbbe’s-suâl mezbûr Mehmed Çelebi cevâb edip mezbûre mehr-i mü’eccelden ve iddet-i nafakadan ve sagīre kızı Emeti nafakasından bi’l-külliyye ferâğat edip bu şart üzere talâk verdim deyicek mezbûre dahi bu husûsu inkâr etdikde mezbûr Mehmed Çelebi beyyineden âciz olup mezbûre Ferahşad’a yemîn billâh etsin dedikde mezbûreye yemîn verilip mâ vaka‘a mezbûre talebiyle kayd olundu. Tahrîren fi’l-yevmi’s-sâdis ve’l-ışrîn min şehri Şevvâl sene 967. Şuhûd: Cafer Halîfe b. Mehmed el-mu‘allim, İlyas b. Abdullah topçu, Ferruh b. Abdullah, Mehmed b. Mustafa el-muhzır, Hasan b. Abdullah ve gayruhüm mine’l-hâzırîn.