Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 97 Hüküm no: 99 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Surre emîni tayin edilen Galata Voyvodası Ali’ye yardımcı olunması Düstûrûn-ı mükerremûn ve müşîrûn-ı mufahhamûn nizâmü’l-âlem mezîdü’l-emvâli’l-cumhû[r]ü’l-kalem Üsküdar’dan Şam-ı şerîf’e varınca yol üzerinde ve yemîn u yesârında vâki‘ olan vüzerâ-yı izâm -edâmallâhu te‘âlâ iclâlehû- ve e‘âzım-ı ümerâ’i’l-küberâi’l-fihâm ve’l-ihtirâm kuzât ve’l-hükkâm ma‘denü’l-fezâil ve’l-kirâm kādılar -zîde fazluhum- mütesellimler ve kethüdâ yerleri ve yeniçeri serdârları ve kavâs ve evkāf zâbitleri ve a‘yân-ı vilâyet -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki Haremeyni’ş-şerîfeyn ahâlîsine alâ-vechi’l-mu‘tâd irsâl oluna gelen surre-i hümâyûn-ı inâyet-makrûnum işbu sene-i mübârekede dahi hazîne-i âmiremden an-nakd ihrâc ve iclâl-i Devlet-i aliyyemden sâbık tersâne-i âmirem emîni ve hâlâ Galata voyvodası olup surre emîni nasb olunan iftihârü’l-emâcid ve’l-a‘yân Ali -zîde mecdühû-ya teslîm yollarda menâzil[de] emn ü muhâfazalarına takayyüd-i tâm eyleyesiz konakçı ta‘yîn olunup sâir levâzımını her ne ise kadr-ı kifâye tedârük[e] ber-mu‘tâd-ı kadîm ri‘âyet ve mahfûz eyleyesiz emr-i şerîfe i‘timâd kılasız. Fî 15 Recebi’l-ferd sene [1]181