Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 98 Hüküm no: 100 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaybolan menzil hüccetinin yenilenmesi Kartal kasabasında mütemekkine Rodini bt. Nikola Nasrâniye tarafından ber-vech-i âti’z-zikri ikrâra ve i‘tâ-i hüccete vekîl olduğu zât-ı mezbûreyi bi’l-ma‘rifeti’ş-şer‘iye ârifân İlya v. Lefter ve Margarit v. Mihail ve Panayot v. Anaştaş zimmîler şehâdetleriyle sâbitü’l-vekâlesi hâlâ zevci Polin v. Mavrodi zimmî meclis-i şer‘-i hatîrde işbu râfi‘ü’r-rakīm Filohidos v. Varsami zimmî muvâcehesinde bi’l-vekâle ikrâr ve takrîr-i kelâm edüp müvekkilem zevcem mesfûrenin yedinde mülkü olup nâhiye-i mezbûreye tâbi‘ Maldepe karyesinde vâki‘ etrâf-ı erba‘ası karındaşı Yorgaki menzili ve Anaştaş avlusu ve leb-i deryâ ve tarîk-i âm ile mahdûd fevkānî bir bâb oda ve bir matbâh ve sofa ve tahtında avlu ve kenîf ve sokak kapısını müştemil mülk menzilini târîh-i kitâbdan on sekiz sene mukaddem tarafeynden bi’l-îcâb ve’l-kabûl işbu merkūm Filohidos zimmîye doksan altı guruş semen-i makbûza bâtten bey‘ u teslîm ve temlîk edüp ol dahi târîh-i mezkûrda ber-vech-i muharrer iştirâ ve tesellüm ve temellük ve kabz u kabûl eyleyüp târîh-i mezkûrdan beri merkūm Filohidos zimmî mülkiyet üzere menzil-i mezkûru tasarruf eder lâkin yedinde olan hüccet-i şer‘iye zâyi‘ olmuş idi el-hâletü hâzihi yine takrîrleri tescîl ve hüccet olunup merkūm Filohidos zimmî yedine vaz‘ u i‘tâ olunmak matlûbumuzdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min--Recebi’l-ferd li-sene ihdâ ve semânîn ve mi’ete ve elf. Şuhûdü’l-hâl: Mukayyidi b. Ağa, Hüseyin Usta, Ahmed Efendi, Kayıkçı Hüseyin Beşe, Hüseyin Ağa. Panoli v. Rali, Aci Yamandi, Aci Yanaki, Aci Angeli, Anaştaş, Pirafil.