Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 250 Hüküm no: 503 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri b. Poli’nin doksan zirâ‘ olarak Ayşe bt. Süleyman’a sattığı harabe bağ yerinin yirmi üç zirâ‘ eksik çıktığı Vech-i tahrîr-i sicil oldur ki Havâss-ı Kostantınıyye’ye tâbi‘ karye-i Arnavud’dan Dimitri b. Poli ile Âişe bt. Süleyman meclis-i şer‘-i şerîfe gelip mezbûr Dimitri muvâcehesinde şöyle da‘vâ eyledi ki karye-i Kavak kurbünde vâki‘ olan harâbe bâğ yerlerinden tûlen bennâ‘ zirâ‘ı ile kırk beş zirâ‘, arzen dahi kırk beş zirâ‘ deyu altı bin akçeye bir yer bey‘ eylediler ben dahi ol arada ölçmeyip iki yıl mikdârı tasarruf eyledim mezbûr sözü ile hâliyâ bey‘ etdim, yirmi üç zirâ‘ noksân olduğu ecilden üzerime red eylediler. Ben dahi ölçdüm vâkı‘a yirmi üç zirâ‘ noksân var, yâ tekmîl-i noksân eylesinler veyâhud şer‘ ile üzerine red ederim deyicek mezbûr Dimitri’ye suâl olundukda inkâr ile cevâb vericek mezbûre Âişe’nin da‘vâ ve talebine muvâfık ve mutâbık beyyine taleb olundukda udûl-i müslimînden ve sikāt-ı muvahhidînden Mustafa b. Ahmed ve Mustafa b. Abdullah bi’l-müvâcehe şöyle şehâdet eylediler ki mezbûr Dimitri merkūme Âişe’ye zikr olan yeri bey‘ eyleyip akçeleşdikleri ve arz ve ende yerin mezbûr Dimitri’nin ağzından şöyle işitdik ki kırk beş zirâ‘ eni kırk beş zirâ‘ uzunu cem‘an tûlen ve arzen doksan zirâ‘ harâbe bâğ yerimi üzümleriyle bey‘ ederim dediğine şâhidleriz şehâdet dahi ederiz deyicek ba‘de’t-ta‘dîli’ş-şer‘î ve’t-tahlîfi’l-âdî bi’l-müvâcehe hayyiz-i kabûlde vâki‘ olup mâ-hüve’l-vâkı‘ bi’t-taleb kayd-ı sicil olundu. Tahrîren fî evahiri Cumâdelâhire sene 967. Şuhûd: İbrahim Hoca b. Sâdık ve Hasan b. Abdullah ve Mehmed b. Mustafa ve Cafer b. Abdullah ve gayruhüm.