Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 264 Hüküm no: 540 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri b. Kosta ve annesi Zukine bt. İstadi’nin miras hususunda Arayeti bt. Kosta’nın zimmetini ibrâ ettikleri Yevmü’l-Cum‘a, fî 29 Vech-i tahrîr-i sicil oldur ki Dimitri b. Kosta ve annesi Zukine bt. İstadi nâm Nasrânîler meclis-i şer‘-i şerîfe hâzırân olup Arayeti bt. Kosta nâm Nasrâniyyenin Yorgi b. Kalyozer ve Kosta b. Monasah nâm Nasrânîler şehâdetiyle mezbûretân ile ibrâya ve ıskāta vekâleti sâbit ve zâhir olan (…) Todora b. Yorgi İskender nâm Nasrânî mahzarında ikrâr-ı şer‘î ve i‘tirâf-ı mer‘î kılıp dediler ki bundan akdem fevt olan Kasab Yorgi li-eb ve üm karındaşım ve annesi olan Zukine nâm [zimmiyye] muhallefâtından bundan akdem yirmi sikke filori ve üç tâne gümüş kadeh bundan akdem mezkûre Arayeti elinden alıp kabûl [ve] kabz etmiş idik hâliyâ kırk beş sikke filori dahi işbu sâhibü hâze’s-sicil vekîli olan Todara elinden şer‘le sâbit olmuş irsle müntakil olan hakkımızı bî-kusûr alıp kabûl ve kabz etdik min ba‘d mezkûre ile irse müte‘allik da‘vâdan ibrâ-i küllî ve ıskāt etdik ba‘de’l-yevm zimmetlerini berî etdik dediklerinde mukırrân-ı mezbûrânın ikrâr ve kavl-i meşrûhlarını vekîl-i mezbûr vicâhen kabûl ve tasdîk edip mâ vaka‘a bi’t-taleb kayd olundu. Tahrîren fî evâhiri Zilhicce li-sene seb‘a ve sittîn ve tis‘a mi’e. Şuhûd: Mustafa b. Abdullah reis-i asesân, İskender Bey sipâhî, Mustafa Çelebi b. Pîrî, Hayreddin b. Toğan el-kayyım, Pîrî Çelebi b. Ahmed, Pervâne b. Abdullah, Ramazan b. Mahmud, Mehmed b. Mustafa el-muhzır, Ferruh b. Abdullah ve gayruhüm.