Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 267 Hüküm no: 548 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Voyvoda Hasan b. Abdullah’ın Dubniçe kazasındaki bazı emlâkini Mustafa Çavuş b. Abdullah’a sattığı Yevmü’l-isneyn, fî 25 min şehri Zilhicce sene 967 Kaziyye-i Mustafa Çavuş Vech-i tahrîr-i hurûf oldur ki Hasan Voyvoda b. Abdullah meclis-i şer‘-i şerîfde ikrâr ve i‘tirâf edip nefs-i kazâ-i [Dubniçe’de bir tarafı] Yunus b. Abdullah mülkü ve kendi eviyle ve tarafeyni tarîk-i âmla mahdûd ve havluyu müştemil olduğu iki kerpiç eviyle ve diğer (…) fevkānî eviyle ve bir anbar ve fırınıyla ve hakk-ı şirbiyle ve bir ahırı ve odasıyla fi’l-cümle hudûdu ve hukukuyla ve kasaba-i mezbûre kurbünde Topolniçe ve Sarıyar nâm karyelerden cârî olan su ile dâir tahdîdden müstağnî iki bâb harâbe değirmenleri ve ona muttasıl bir kıt‘a bahçesi ile ve kasaba-i mezbûre sınırında vâki‘ olan dört kıt‘a çayırım ve on kıt‘a tarlam bu cümle elân zabtımda [ve] tasarrufumda olan emlâkimi işbu sâhibü hâze’l-hüccet fahrü’l-akrân Mustafa Çavuş b. Abdullah’a on iki bin nakd-i râyic fi’l-vakt fıddî-i Osmanî akçeye bey‘-i bâtla bey‘ edip teslîm-i mebî‘ ve kabz-ı semen dahi etdim dedikde mukırr-ı mezbûrun ikrâr ve kavl-i meşrûhunu mukarrun leh-i mezbûr Mustafa Çavuş vicâhen tasdîk edip talebiyle işbu vesîka ketb olunup yedine verildi ki vakt-i hâcetde ihticâc edine cerâ zâlik ve hurrire Fî evâhiri Zilhicce min şuhûri sene seb‘a ve sittîn ve tis‘a mi’e. Şuhûdü’l-hâl: Cafer Halîfe b. Pîr Mehmed el-mu‘allim, Süleyman Halîfe b. Ali. Yevmü’s-sülâsâ, fi 26 min şehri Zilhicce sene 967, h[âlî] Yevmü’l-erbi‘â, fî 27, h[âlî]