Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 268 Hüküm no: 550 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Nikola b. Oseb’in aldığı borç karşılığında evini Kasap Kara İstemad b. Papa Manol’a rehin verdiği Vech-i tahrîr-i hurûf oldur ki Maçuka nâm karyeden Kara Nikola b. Oseb mahfil-i şer‘-i şerîfe hâzır olup Kasab Kara İstemad b. Papa Manol mahzarında ikrâr-ı şer‘î ve i‘tirâf-ı mer‘î kılıp dedi ki bundan akdem işbu Kara İstemad’dan yedi bin nakd-i râyic fi’l-vakt akçe alıp hâliyâ karye-i mezbûrede hudûd-ı erba‘asından bir tarafı Saraylı Hatun mülkü ve iki tarafı tarîk-i âm ile ve bir tarafı Kethüdâ İstemad b. Nikola mülküne müntehî ve mahdûd olan tahtânî evimi önünde çardak ile bahçesiyle ve cemî‘-i tevâbi‘ ve levâhık ile târih-i sicilden altı ay tamâmına varınca mülk-i mezbûrumu meblağ-ı mezkûr mukābelesinde rehin verdim eğer müddet-i ma‘lumede meblağ-ı mezkûru vermeğe kādir olmaz isem mülk-i mezbûr mezbûr Kasab İstemad’ın mülk-i sarîhi olsun ve mülk-i mezbûrun derkine Kethüdâ İstemad’ı kefîl bi’l-mâl verdim dedikde mukırr-ı mezbûrun ikrârı ve kavl-i meşrûhunu mezbûrân Kasab İstemad ve Kethüdâ İstemad nâm kimesneler vicâhen kabûl ve tasdîk edip mâ vaka‘a bi’t-taleb kayd olundu. Tahrîren fî evâhiri Zilhicce sene 967. Şuhûd: Hasan b. Abdullah, Sipâhî Mahmud Bey, Ferhad Bey sipâhî, Mehmed b. Mahmud, Sadi Subaşı b. Yusuf, Papas Dimitri, Papas Yorgi b. (...), (…), Dimitri b. Yorgi, İstadonoşa b. Mihal, Dimitri [b.] Pana Yorgi, Dimitri b. Yorgi ve gayruhüm.