Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 286 Hüküm no: 593 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri Ahmed b. Abdullah’ın talebi üzerine karısı Hüma Hatun hakkında soruşturma yapıldığı Vech-i tahrîr-i sicil oldur ki Beşiktaş mahallâtı[ndan] Yenice nâm mahalleden Yeniçeri Ahmed b. Abdullah nâm kimesne mahalle-i mezbûre imâmı ve müezzin ve sâir cemâ‘at ile mahfil-i şer‘-i şerîfe hâzırûn olduklarında mezbûr takrîr-i da‘vâ edip Yeniçeri Ahmed bundan akdem ben donanma-i hümâyûnda iken subaşı mahalleden bazı kimesneler ile evimde nâ-mahrem vardır deyu üzerine vardıklarında nâ-mahrem bulunmamış imiş hâliyâ hatunumdan keyfiyet-i hâlini tefahhus etmek murâdımdır dedikde mezkûre Hüma Hatun’un hâlini mahalle imâmı Nebî b. Mustafa, diğer Nebî Halîfe b. Safer müezzin ve cemâ‘atden Mehmed b. Abdullah ve Davud b. Abdullah ve Eyüb b. Abdullah dellâk ve Mustafa b. Abdullah aşçıbaşı ve Hayreddin b. Toğan el-kayyım-ı câmi‘-i şerîf ve Hüsrev b. Abdullah ve Behram Sofu b. Abdullah ve gayrı nâm kimesneler işbu Yeniçeri Ahmed, Hatun Hüma’nın iyiliğine şehâdet etmeziz iyi hatun değildir, zîrâ evine nâ-mahrem levend gelir gider dâimâ nâ-mahrem kimesneler ile musâhabet eder, mahallede ya mezkûre hatun dursun ya biz durmayalım ve’l-hâsıl şâkir değil eyle bize gerekmezin dediklerinde mezbûrların mezkûre hatun hakkında olan kelimâtı zevci Yeniçeri Ahmed talebiyle kayd-ı sicil olundu. Tahrîren fi’l-yevmi’r-râbi‘ aşer min şehri Muharremi’l-harâm li-sene semân ve sittîn ve tis‘a mi’e. Şuhûd: Kıdvetü’l-emâsil Mustafa Çavuş, Fahrü’l-akrân Cafer Ağa, Şaban b. Yusuf bölükbaşı, Pervâne b. Abdullah, Keyvan b. Abdullah, Ferruh b. Abdullah ve Mehmed b. Mustafa el-muhzır, Hüseyin b. Abdullah ve gayruhüm mine’l-hâzırîn.