Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 288 Hüküm no: 599 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi b. Françesko’nun ölen kardeşi Andreya’nın terekesinden hissesini alıp diğer varislerin zimmetini ibrâ ettiği Kaziyye-i Andreya-i Kûçek Vech-i tahrîr-i sicil oldur ki Yorgi b. Françesko nâm Nasrânî mahfil-i şer‘a hâzır olup Beşiktaşı’nda bundan akdem fevt olan Andreya b. Françesko eytâm-ı sıgārına kıbel-i şer‘den vasî nasb olunan Dîvâne Todora b. Yorgi mahzarında ikrâr ve i‘tirâf edip li-eb ve üm karındaşım Andreya’nın muhallefâtından nakidden ve esbâbdan ve emlâkden cüz’î ve küllî bi’l-cümle her ne ise bana irsle intikāl eden hisse-i şer‘iyyem için işbu sâhibü hâze’s-sicil Todora elinden yedi yüz nakd-i râyic fi’l-vakt dahi akçeyi bî-kusûr alıp kabûl [ve] kabz etdim ba‘de’l-yevm irse müte‘allik cemî‘-i de‘âvîden mezbûr Todora’yı ve müteveffâ karındaşım zevcesi Markolna ve sulbiye kızları Zaniya ve Zeyu ve Aleksandra nâm cümlesinin zimmetlerini ibrâ ve ıskāt etdim dedikde mukırr-ı mezbûrun ikrârı ve kavl-i meşrûhunu vasiyy-i mezbûr kabûl ve tasdîk etdikde mâ vaka‘a bi’t-taleb kayd olundu. Tahrîren fi’l-yevmi’s-sâbi‘ aşer min-Muharremi’l-harâm sene 968. Şuhûd: Ramazan b. Mahmud, Mehmed b. Abdullah, Cafer Ağa, Şaban b. Yusuf, İbrahim Hoca el-müezzin, Hayreddin b. Doğan el-kayyûm, Hüseyin Çavuş b. Abdullah, Papas Dimitri [b.] Yani, Aleksi b. Pakoz, Yorgi [b.] Pololokoz.