Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 48 Hüküm no: 5 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gürcü asıllı Mustafa’nın Kılıçalipaşa mahallesinden vefat eden Mustafa’nın kendisini azad ettiğini ispat ettiği İşbu açık kaşlı elâ gözlü orta boylu Gürciyyü’l-asl Mustafa b. ( ) nâm kimesne mahfil-i kazâda mahmiye-i Galata muzâfâtından kasaba-i Beşiktaş’da vâki‘ merhûm Kılıçalipaşa mahallesinde sâkin iken fevt olan diğer Mustafa’nın sulbiye sagīre kızı Hadice’nin tesviye-i umûruna vasiyy-i mansûbu olan zahrü’l-a‘yân Alaybeyi Şaban Ağa muvâcehesinde takrîr-i kelâm ve ta‘bîr ani’l-merâm edüp bundan esbak ben merkūm Mustafa Beşe’nin ben abd-i memlûku olup hâl-i hayâtında Müslimîn huzûrunda beni tedbîr-i mutlak ile müdebber etmiş iken merkūm Şaban Ağa beni rık olmak zu‘muyla bana vaz‘-ı yed eder suâl olunup yedi kasr ve izâle olunması matlûbumdur deyicek gıbbe’s-suâl vasiyy-i mezbûr fi’l-hakīka merkūm Mustafa’yı müteveffâ-yı merkūm vech-i muharrer üzere müdebber eylediği ma‘lûmum değildir dedikde müdde‘î-i mezbûrdan sıdk-ı makāline beyyine taleb olundukda udûl-i ricâlden mefharü’l-hutebâ Eşref Efendi b. Veli ve Receb Ağa b. Şaban ve Şeyh Cum‘a b. Mehmed nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı merkūm Mustafa müdde‘î-i mezbûru tedbîr-i mutlak ile müdebber eylediği bizim ma‘lûmumuzdur bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe ri‘âyeti şerâiti’l-makbûl şehâdetleri hayyiz-i kabûlde vâkı‘a olmağın müteveffâ-yı mezbûrun cümle malından müdde‘î-i mezbûrun ıtkına hüküm birle bu hurûf ketb u terkīm olundu. Hurrire fî-evâhiri [2b] Zilka‘deti’ş-şerîfe li-sene ihdâ ve sittîn ve elf. Şühûdü’l-hâl: Bayram Ağa b. Abdullah, Ahmed Çelebi el-Müezzin, Yusuf Beşe b. Abdullah, Yahya Çelebi b. ( ), Ali Çelebi b. Ahmed, Mehmed Ağa ve gayruhüm.