Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 50 Hüküm no: 7 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Abdullah’ın boşandığı kocası Mehmed Beşe b. Memi’den mehr-i müeccelini tahsil ettiği Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinelerinden Meryem bt. Abdullah nâm Hatun tarafından husûs-ı âti’l-beyânı ikrâra vekîl olup Mustafa Çelebi b. Keyvan ve Hüseyin Çelebi b. Perviz nâm kimesneler şehâdetleri ile şer‘an vekâleti sâbite olan Mehmed Çelebi b Şaban Bey nâm kimesne meclis-i şer‘-i şerîf-i lâzımü’t-teşrîfde müvekkile-i mezbûre Meryem Hatun’un zevc-i mutallıkı işbu râfi‘ü’l-kitâb Mehmed Beşe b. Memi nâm kimesne muvâcehesinde bi’l-vekâle ikrâr ve takrîr-i kelâm edüp bundan akdem müvekkile-i mezbûre Meryem Hâtûn’u merkūm Mehmed Beşe tatlîk eylediğinde zimmetinde mütekarrer olan kırk bir riyâlî guruş-ı kebîr mehr-i müeccelini mezbûre Meryem Hatun’a edâ ve teslîm eylememiş idi hâlâ meblağ-ı mezkûr kırk bir riyâlî guruşu mersûm Mehmed Beşe yedinden vekâletim hasebiyle bi’t-tamâm ve’l-kemâl ahz u kabz eyleyüp husûs-ı mezbûra müte‘allika merkūm Mehmed Beşe zimmetinde müvekkilem merkūme Meryem Hatun’un bir akçe ve bir habbe hakkı bâkī kalmadı dedikde vekîl-i mezbûr Mehmed Çelebi’nin bi’l-vekâle cârî ve sâdır olan kelâmını merkūm Mehmed Beşe vicâhen tasdîk ve şifâhen tahkīk [3a] etmeğin mâ-hüve’l-vâkı‘ bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min-Zilka‘deti’ş-şerîfe li-sene ihdâ ve sittîn ve elf. Şühûdü’l-hâl: Şuhûdü’s-sâbıkūn, es-sâbıkūn.