Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 50 Hüküm no: 8 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Kaya’nın evini müştemilatıyla birlikte hanımı Emine Hatun bt. Hacı Sefer’e sattığı Mahmiye-i Galata muzâfâtından kasaba-i Beşiktaş’da vâki‘ Maçka nâm mahallede sâkin İsmail b. Kaya nâm kimesne tarafından ikrâr-ı âti’l-beyâna vekîl olup nehc-i mu‘teber-i şer‘î üzere vekâleti sâbite olan Mustafa Bey b. İbrahim el-Cündî mahfil-i kazâda işbu hâfızatü’l-kitâb müvekkil-i merkūmun zevcesi Emine Hatun bt. el-Hâc Sefer muvâcehesinde ikrâr u i‘tirâf edüp mahalle-i merkūmede vâki‘ bir tarafı Ahmed Çelebi b. Mehmed er-râcil mülkü ve bir tarafı makābir ve iki tarafı tarîk-i âm ile mahdûd fevkānî bir bâb ve tahtânî bir bâb beyti ve muhavvata ve iki bi’r-i mâ’yı ve arz-ı hâliyeyi müştemil mülk menzilini cümle tevâbi‘ ve levâhıkı ile beş bin otuz beş akçeye müvekkile-i merkūme Emine Hatun’a bey‘-i bâtt-ı kat‘î ile bey‘ edüp ol dahi iştirâ ve kabûl ve kabz eyledikden sonra semeninin üç bin akçesi‘çün zevci zimmetinde olan üç bin akçe mehr-i müeccel esedî ve iki bin otuz beş akçesi‘çün mukır ve mu‘terif olduğu karz-ı şer‘iyyesi on bir aded altın ki bi-hesâb-ı akçe cem‘an beş bin otuz beş akçe eder hakk-ı şer‘îsine takās etmekle ol dahi takāss-ı merkūmu kabûl etmeğin menzil-i mahdûd-ı mezkûr merkūme Emine’nin mülk-i müşterâsıdır keyfe mâ teşâ ve tehtâr mutasarrıf olsun vechen mine’l-vücûh müvekkilimin alâkası yokdur dedikde gıbbe’t-tasdîki’ş-şer‘î vicâhen mâ-hüve’l-vâkı‘ bi’t-taleb ketb olundu. Fi’l-yevmi’l-hâdî min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Mahmud Çelebi, Yusuf Bey, Hasan Çelebi b. Ahmed, el-Hâc Mustafa ve gayruhüm.