Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 55 Hüküm no: 14 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Hasan’a borçlu olup hapsedilen Ali Bey b. Mustafa’nın borcunun bir miktarının devlet tarafından ödenmesi üzerine Ali Bey’in serbest bırakıldığı Zümre-i râcilînden İbrahim Beşe b. Hasan mahfil-i kazâda işbu râfi‘ü’l-kitâb Ali Bey b. Mustafa nâm kimesne muvâcehesinde takrîr-i kelâm ve ta‘bîr ani’l-merâm edüp târih-i kitâbdan yirmi beş sene mukaddem merkūm Ali Bey’de beynimizde keyli ma‘lûm buğday bahâsından yedi bin kâsid akçe hakkım olup taleb eylediğim hînde meblağ-ı mersûmu bana edâya adem-i kudreti olmağın izn-i hâkim ile sicn-i sultânîde mahbûs olunup ba‘dehû sicn-i mezbûrda olan mahbûsların tahlîsi için taraf-ı Saltanat-ı aliyye’den sicn-i mezbûrda mahbûs medyûnların dâyinlerini birer mikdâr akçeye sulh eylediklerinde mezbûr Ali Bey’in deyni olan meblağ-ı mezkûr mukābelesinde beni dahi yirmi beş esedî guruşa sulh eyleyüp ben dahi sulh-ı mezbûru kabûl ve bedel-i sulh olan meblağ-ı mezkûru yedinden ahz u kabz eyledim deyü sulh-ı mezbûru meclis-i şer‘de ikrâr u i‘tirâf eylemeğin işbu hurûf ber-sebîl-i temessük ketb olundu. Tahrîren fi’l-yevmi’l-hâmis min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Mehmed Ağa b. Şaban, Ömer Bey b. Ali, Yahya Çelebi b. Hasan Müezzin, Himmet Beşe b. Mahmud, Zülfikār Beşe b. Mehmed, Mustafa Beşe b. Mehmed, Hasan b. Mehmed, Mehmed Çelebi b Ramazan, Mehmed Çelebi b. el-Hâc Mahmud ve gayruhüm.