Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 54 Hüküm no: 13 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yani’nin üç adet bağını Gratine bt. Yorgi’ye sattığı Mahmiye-i Galata dâhilinde vâki‘ merhûm Sultân Bayezid mahallesi sükkânından Nikola v. Yani nâm zimmî meclis-i şer‘-i şerîfde işbu râfi‘atü’s-sifr Gratine bt. Yorgi nâm Nasrâniye tarafından husûs-ı âti’z-zikri tasdîka nehc-i şer‘î üzere vekîl olan Kiryako v. Yani nâm zimmî muvâcehesinde bi-tav‘ihî ikrâr ve takrîr-i kelâm edüp mahmiye-i mezbûre muzâfâtından kasaba-i Beşiktaş’a tâbi‘ Arnavud nâm karye kürûmu dâhilinde vâki‘ bir tarafı Yako nâm Yahudi bağı ve bir tarafı Aryadi? nâm zimmî bağı ve bir tarafı Malamatine nâm Nasrâniye bağı ile mahdûd bir kıt‘a bağ ve yine karye-i mezbûrede vâki‘ bir tarafı mezbûre Malamatine bağı ve iki tarafı beylik bahçe ve bir tarafı tarîk-i âm ile mahdûd bir kıt‘a bağ ve yine karye-i mezbûrede vâki‘ iki tarafı merkūme Malamatine nâm Nasrâniye bağı ve bir tarafı Aleksi nâm zimmî bağı ve bir tarafı arz-ı hâliye ile mahdûd bir kıt‘a bağ ki cem‘an üç kıt‘a mülk bağlarımı mezbûre Gratine’ye yüz elli kıt‘a tâmmü’l-vezn ve kâmilü’l-ayâr riyâlî guruş-ı kebîre tarafeynden îcâb ve kabûlü hâvî safka-i vâhidile bey‘-i bâtt-ı sahîh-i şer‘î ile bey‘ u teslîm edüp ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mezbûr yüz elli kıt‘a riyâlî guruş-ı kebîri mezbûre Gratine yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr bağlar merkūme Gratine’nin mülk-i müşterâsı ve hakk-ı sırfıdır keyfe mâ teşâ ve tehtâr sâir emlâki gibi mutasarrıfe olsun dedikde mukırr-ı mezbûr Nikola’nın cârî ve sâdır olan ikrârını vekîl-i mezbûr Kiryako bi’l-müvâcehe tasdîk ve bi’l-müşâfehe tahkīk edicek mâ-hüve’l-vâkı‘ bi’t-taleb ketb olundu. Tahrîren fi’l-yevmi’l-hâmis min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Mustafa Efendi el-İmâm, Mehmed Beşe b. Şaban, Mehmed Beşe b. Abdullah, Ahmed Beşe b. İbrahim, Mehmed Beşe b. Abdullah, Mustafa Beşe b. Abdullah, Mehmed Beşe b. Abdullah ve gayruhüm mine’l-hâzırîn. Mihalo v. Köcek, Yamandi v. Hristodidi, Kostantin Reis v. Efhan, İskolo v. Manol, Yorgi v. Manoli, Yani v. Cise, İstefani v. Petro, Lamberto? v. Anderya, Anderya v. Yani, Androni v. Yani, İstirati v. Androni ve gayr-ı huzzârîn-i mahalle. Beyâz sahh