Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 56 Hüküm no: 16 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Mihal’in bağını Seyyid Hasan Paşa avarızı vakfına istiğlâl yoluyla satıp, bir seneliğine vakıftan kiraladığı Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinlerinden Yamandi v. Mihal nâm zimmî meclis-i şer‘-i hatîr-i lâzımü’t-tevkīrde kasaba-i mezbûrede vâki‘ merhûm es-Seyyid Hasan Paşa avârızı vakfının nukūduna bi’l-fi‘il mütevellî olan işbu râfi‘ü’l-kitâb Ali Çelebi b. Ahmed nâm kimesne muvâcehesinde ikrâr ve takrîr-i kelâm edüp kasaba-i mezbûreye tâbi‘ Arnavud nâm karye bağları sınırı dâhilinde vâki‘ bir tarafı Nikola nâm zimmî bağı ve bir tarafı Apostol nâm zimmînin harâbe bağ yeri ve bir tarafı Şerano nâm zimmî bağı ve bir tarafı tarîk-i âm ile mahdûd mümtâz tahmînen iki dönüm mikdârı mülk bağımı mezbûr Ali Çelebi’ye vakf-ı mersûm malı ile yirmi kıt‘a esedî guruşa bi-tarîki’l-istiğlâl bey‘ ve teslîm edüp ol dahi vech-i muharrer üzere alâ-tarîki’l-istiğlâl iştirâ ve tesellüm eyledikden sonra semeni olan meblağ-ı mârrü’z-z[ikri] yirmi kıt‘a esedî guruşu yedinden bi’t-tamâm ve’l-kemâl ahz u kabz ettiğimden sonra bağ-ı mahdûd-ı mezkûru târih-i kitâb gurresinden üç yüz altmış gün tamâmına değin üç kıt‘a esedî guruşa mütevellî-i merkūm Ali Çelebi’den istîcâr ve kabz ve tesellüm edüp ol dahi vech-i muharrer üzere bağ-ı mezkûru bana îcâr ve def‘ u teslîm eylemişdir dedikde gıbbe’t-tasdîki’ş-şer‘î mahalle-i mezbûre [5b] sâkinlerinden merkūm Yamandi’nin zevcesi Anson bt. Manol nâm Nasrâniye bağ-ı mersûmun derkine kefîl olmağın mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Mahmud Çelebi b. Mehmed, Mehmed Çelebi b. Ali, Hasan Çelebi b. Muharrem, Mahmud Çelebi b. Şaban, Yahya Çelebi b. Hasan el-Müezzin, Mehmed Çelebi b. Şaban, Abdülbâkī Çelebi b. Derviş, İbrahim Çelebi [b.] İsmail.