Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 56 Hüküm no: 17 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Çelebi b. Sadık Yazıcı’nın vârislerinin kendilerine intikal eden Rus asıllı köle Yusuf b. Abdullah’ı azad ettikleri Mahmiye-i Galata’ya tâbi‘ kasaba-i Beşiktaş mahallâtından Areb İskelesi demekle ma‘rûf mahallede sâkin iken bundan akdem müteveffâ olan Ali Çelebi b. Sadık Yazıcı nâm müteveffânın verâseti kebîr oğulları Fazlı Çelebi ve Cafer Çelebi’ye ve kebîre kızı Neslihân Hatun’a münhasıra idüği şer‘an zâhir ve mütebeyyin oldukdan sonra ikrâr-ı âti’l-beyânı kendi tarafından asıl ve mezbûr Cafer Çelebi ve merkūme Neslihân Hatun taraflarından nehc-i şer‘î üzere vekîl olan mersûm Fazlı Çelebi mahfil-i kazâda mûrisimiz müteveffâ-yı mezbûr Ali Çelebi’nin kullarından kendüye rıkkı mu‘terif olup her birimize irsen intikāl eden işbu meclis-i şer‘de hâzır uzun boylu açık kaşlı elâ gözlü Rusiyyü’l-asl hâmil-i hâze’l-kitâb Yusuf b. Abdullah nâm abd-i memlûkümüz muvâcehesinde ikrâr ve takrîr-i kelâm edüp evsâf-ı mezbûre ile mevsûf olan merkūm Yusuf’u asâleten ve vekâleten hasbeten lillâhi’l-azîm ve taleben li-rûhi resûlihi’l-kerîm i‘tâk ve tahrîr ve mülkümüzden ihrâc ve silk-i ahrâr-ı asliyyîne idrâc eyledik ba‘de’l-yevm merkūm Yusuf sâir ahrâr-ı asliyyîn gibi hür olup üzerinde hakk-ı velâdan gayrı hakkımız kalmadı dedikde mukırr-ı mezbûr Fazlı Çelebi’nin asâleten ve vekâleten cârî ve sâdır olan kelâmını mezbûr Yusuf vicâhen ve şifâhen tahkīk ve tasdîk eylemeğin mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Mustafa Çelebi b. İbrahim el-İmâm, Salih Efendi el-İmâm, Mehmed Ağa b. Abdullah, Mehmed Beşe b. Veli, Yusuf Efendi el-Müezzin, Kurd Çelebi el-Müezzin, İbrahim Çelebi b. el-Hâc Mahmud, Yusuf Bey b. Abdullah, Hüseyin Beşe b. Resul, Terzi Süleyman [b.] Abdullah, Himmet Beşe b. Mahmud, el-Hâc Hasan, Mustafa Muhzır.