Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 60 Hüküm no: 22 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortaköy’de geceleyin bir bahçede üç kadın ile üç erkeğin birlikte içki içtiklerinin tespit edildiği Mahmiye-i Galata muzâfâtından kasaba-i Beşiktaş’da bi’l-fi‘il subaşı olan fahrü’l-akrân Ali Bey b. Mustafa nâm kimesne <> işbu târih-i kitâb gecesi sülüs-i leylde meclis-i şer‘de takrîr-i kelâm edüp kasaba-i mezbûreye tâbi‘ Orta nâm karyede vâki‘ Şaşı Hânım demek ile ma‘rûf hanımın bahçesinde Rahime bt. Abdullah ve Fâtıma bt. Mehmed ve Âişe bt. Abdullah nâm avretler mahrûse-i İstanbul’da Hocapaşa mahallesinde sâkine olup kendilere nâ-mahrem Resul b. Mehmed ve Ahmed b. Resul nâm kimesneler ile ma‘an şürb-i hamr edüp mu‘âmele üzere oldukları mesmû‘um olmuşdur taraf-ı şer‘den üzerine varılup ba‘de’l-mu‘âyene vâki‘-i [hâl] keşf ve tahrîr olunması matlûbumdur dedikde küttâb-ı mahkemeden Mevlâna Ahmed Efendi irsâl olunup ol dahi zeyl-i kitâbda mastûrü’l-esâmî cemâ‘at-ı Müslimîn ile bahçe-i mezbûra vardıklarında fi’l-hakīka mezbûrât avretler ile merkūmân Resul ve Ahmed ma‘an bir yerde oturup ve şarâb ve bozaları dahi mevcûd olduğu hâlde ahz olundukda hakīkat-i hâl mezbûrlardan suâl olundukda mezbûr Ahmed cevâbında merkūme Fâtıma benim fâhişem olup ve mezbûre Rahime Resul’ün zevcesi olup ve mezbûre Âişe dahi bunda sâkine olup gâhîce bu mahalle gelip şürb-i hamr eyleriz deyü ikrâr u i‘tirâf eylediklerinde mevlânâ-yı mezbûr mahallinde tahrîr ba‘dehû meclis-i şer‘a ihzâr edüp vech-i meşrûh üzere haber vermeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Hasan Çelebi b. Muharrem Bey, Yahya Çelebi b. Hasan Müezzin, Nuh Çelebi b. Mehmed, Himmet Beşe b. Mahmud, Arslan Beşe b. Hasan, Aydın b. Ali, Kasım Beşe b. Mehmed, İbrahim Beşe b. Cafer, Zülfikār Beşe b. Mehmed, İbrahim Beşe b. Abdullah ve gayruhüm.