Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 59 Hüküm no: 21 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun bt. Abdullah’ın nukud vakfı Elhamdü lillâhi ve’s-salâtü alâ-nebiyyihî ve alâ-âlihî ve ashâbihi’l-müte’eddibîne bi-âdâbihî ammâ ba‘d işbu kitâb-ı sıhhat-nisâbın tahrîr ve inşâsına bâ‘is ü bâdî budur ki mahmiye-i Galata muzâfâtından kasaba-i Beşiktaş’da vâki‘ merhûm Kılıç Ali Paşa Sarayı mahallesinde sâkine fahrü’l-muhadderât ve tâlibetü’l-meberrât Saliha Hatun bt. Abdullah tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Bayram Ağa b. Abdullah ve Ahmed Çelebi b. Cafer şehâdetleriyle şer‘an vekâleti sâbite olan zevci zahrü’l-a‘yân Receb Bey b. Şaban meclis-i şer‘de li-ecli’t-tescîl mütevellî nasb u ta‘yîn eylediği Eşref Efendi b. Veli muvâcehesinde bi’l-vekâle ikrâr-ı tâm ve takrîr-i kelâm edüp müvekkilem müşârun ileyhâ atyeb-i malından yüz aded tâmmü’l-vezn ve kâmilü’l-ayâr riyâlî guruş-ı kebîrini vakf ve habs edüp mütevellî-i merkūma teslîm ol dahi tesellüm ve kabz eyleyüp sâir evkāf mütevellîleri gibi bir ay-ı kâmil tasarruf eyledikden sonra şöyle şart eyledi ki meblağ-ı mezbûr mütevellî yediyle alâ-vechi’l-helâl onu on bir buçuk hesâbı üzere rehn-i kavî ve kefîl-i melî birle istiğlâl ve istirbâh olunup hâsıl olan ribh ve nemâdan her kim mahalle-i mezbûre mescidinde imâm olursa beher yevm ba‘de salâti’s-subh birer Yâsîn-i şerîf tilâvet ve kırâ’et eyleyüp sevâbını sadrî kebîr oğlu merhûm Numan Çelebi’nin rûh-ı pür-fütûhuna hibe eyleye ve meblağ-ı bâkī mine’r-ribh vazîfe-i tevliyet ola ve müvekkilem hayâtda oldukça bi nefsihâ kendi mütevellî ola ve ba‘de vefâtihâ re’y-i hâkim ile ahâlî-i mahalleden bir mu‘temedün-aleyh kimesne mütevellî olup ahâlî-i mahalle hasbî nâzır olalar deyüp meblağ-ı merkūm yüz guruşu târih-i kitâbdan bir ay mukaddem mütevellî-i mezbûra teslîm edüp ol dahi kabz ve tesellüm eyleyüp mütevellîler sâir evkāfı tasarruf eyledikleri gibi tasarruf eylesin vazîfe-i mu‘ayyenesi olan yevmî akçeyi ahz u kabz eyledi dedikde vekîl-i merkūmu kelimât-ı meşrûhasında mütevellî-i merkūm bi’l-müvâcehe tasdîk vekîl-i müşârun ileyh takrîr-i da‘vâ edüp vakf-ı nukūd ve zımnında olan şurût [ve] kuyûd eimme-i selâse katlarında bâtıl olduğu ecilden meblağ-ı merkūmu istirdâd ederim ve mahsûl-i vakfdan cihet-i tevliyet deyü aldığı ecr-i misl-i ma‘hûddan zâidlerini dahi taleb ederim deyüp hâkim-i muvakki‘-i kitâba mürâfa‘a olduklarında mütevellî cevâba tasaddî olup eğerçi vakf-ı nukūdda hâl minvâl-i muharrer üzeredir lâkin İmâm Züfer mezhebi üzere sahîh ve câiz ve İmâmeyn katında cevâz lüzûmu müstelzimdir deyüp hükm taleb eyledikde âlimen bi’l-hilâf alâ-men yerâhu sıhhatine sâniyen sıhhat-i lüzûmu müstelzim idüğüne hükm-i muhkem ve kazâ-i mer‘î edicek vakf sahîh ve lâzım ve tescîl oldu. “Fe-men beddelehû ba‘de mâ semi‘ahû fe-innemâ ismühû ale’llezîne yübeddilûnehû innallâhe semî‘un alîm” cerâ zâlik Ve hurrire [7b] fi’l-yevmi’l-ışrîn min-Zilhicce li-sene ihdâ ve sittîn ve elf. Şühûdü’l-hâl: Abbas Bey b. İbrahim Bey, Yahya Çelebi b. Perviz, Ali Beşe, Şeyh Ahmed b. Mehmed, Mahmud b Murad, Veli Beşe ve gayruhüm.