Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 163 Hüküm no: 116 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçadur v. Hazer’in kızı Parise’ye annesinden intikal eden paradan borç alması Medîne-i Üsküdar-ı meymenet-âsârda Kādı karyesinde mütemekkine iken bundan akdem hâlike olan Azir bt. Haçadur Nasrâniyenin sadriye sagīre kızı Parise’nin babası ve velîsi Haçadur v. Hazer zimmî meclis-i şer‘-i şerîf-i enverde sagīre-i mersûmeye tashîhan li’s-sakk vasî nasb olunan muhzır tâbi‘i İbrahim Edhem Ağa b. Mehmed mahzarında ikrâr ve takrîr-i kelâm edip velîsi olduğum kızım sagīre-i mersûmenin anası hâlike-i mersûmeden mevrûs malı olup ben bi’l-velâye kabz ve bilâ-zarûre kendi umûruma sarfla istihlâk eylediğim yirmi dört bin dört yüz kırk altı guruş ile semeni işbu târîh-i vesîkadan üç sene tamâmına değin müeccel ve mev‘ûduna sagīre-i mersûmenin malından vasiyy-i mezbûr yedinden iştirâ ve kabz eylediğim iki aded hilâlî sâ‘at semenlerinden dahi yedi bin kırk guruş on yedi para ki cem‘an otuz bir bin dört yüz seksen altı guruş on yedi para zimmetimde kızım sagīre-i mersûmeye vâcibü’l-edâ deynimdir dedikde gıbbe’t-tasdîk Havâss-ı refî‘a kazâsına muzâfe kasaba-i Hasköy’de Mahmud Ağa mahallesinde mütemekkinler Galata’da tüccâr yazıcısı Haçadur ve mağazacı Arakil veledey-i Tatos ve kasaba-i mezbûrede Abdüsselam mahallesinde mütemekkin Asmaaltı’nda tüccârdan Hazeros v. Avakim ve mukırr-ı mersûmun li-ebeveyn er karındaşları Poliçeci Kokas ve Uzunçarşı’da Dülbendçi Bedros zimmîler meclis-i şer‘-i münîrde vasiyy-i mezbûr İbrahim Edhem Ağa mahzarında ikrâr ve takrîr-i kelâm edip mukırr-ı mersûm Haçadur zimmînin zimmetinde kızı sagīre-i mersûmeye edâsı vâcib deyni olan meblağ-ı mecmû‘-ı mezkûr otuz bir bin dört yüz seksen altı guruş on yedi paraya tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile herbirimiz müte‘âkiben kefîl bi’l-mâl ve zâminiz dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 29 Ş sene [1]256. Şuhûdü’l-hâl: es-Seyyid Aşır Efendi, es-Seyyid Mehmed Efendi, Muhzır Mehmed Ağa, Nesib Ağa tâbi‘-i muhzır.