Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 72 Hüküm no: 38 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Vasil’in Avraham v. David’e olan borcunu taksitle ödeme taahhüdü Senyora cemâ‘atinden işbu hâfızü’l-vesîka Avraham v. David nâm Yahudi mahfil-i kazâda mahmiye-i Galata muzâfâtından kasaba-i Beşiktaş’a tâbi‘ Orta nâm karyede sâkin Dimitri v. Vasil nâm zimmî muvâcehesinde takrîr-i kelâm ve ta‘bîr ani’l-merâm edüp karye-i mezbûre sınırında Kasımdulu nâm mevzi‘de vâki‘ bir tarafı Arslan nâm Yahudinin bağ yeri ve bir tarafı Kebeci Ermeni bağı ve bir tarafı Kanelo nâm zimmî tarlası ve bir tarafı vâdi ile mahdûd tahmînen sekiz dönüm mikdârı mülk bağım ücretinden yüz on üç aded guruş ve karz-ı şer‘îden yüz aded guruş dahi cem‘an iki yüz on üç guruş hakkımı beher senede yetmiş birer aded guruş vermek üzere meblağ-ı mersûmu târih-i kitâbdan üç sene tamâmına dek haklaşmak üzere merkūm Dimitri’ye taksît eylediğimde ol dahi taksît-i mezbûru kabûl ve minvâl-i muharrer üzere edâya müte‘ahhid olmuşdur suâl olunup takrîri tahrîr olunması matlûbumdur deyicek gıbbe’s-suâl mezbûr Dimitri cevâbında fi’l-hakīka merkūm Avraham’dan istîcâr eylediğim mezkûr bağın yüz on üç aded guruş ecr-i mislinden ve yüz guruş karz-ı şer‘îden cem‘an tâmmü’l-vezn iki yüz on üç guruş hakkını târih-i kitâbdan üç sene tamâmına dek haklaşmak üzere meblağ-ı mârrü’z-zikrden beher sene yetmiş birer guruş kendüye edâ ve teslîm etmek üzere üzerime taksît eyledikde ben dahi zikr olunan taksît ile deynim olan iki yüz on üç guruş hakk-ı şer‘îsini edâya müte‘ahhid oldum deyicek mâ-vaka‘a bi’t-taleb ketb olundukdan sonra karye-i mezbûre sâkinlerinden Panayot v. Yani ve Todori v. Yorgaki nâm zimmîler li-ecli’l-kefâle meclis-i şer‘a hâzırân olup zikr olunan karz-ı şer‘îden yüz guruşa herbiri emr-i kabûlü hâvî kefâlet-i sahîha-i şer‘iyye ile kefîl oldukları gıbbe’t-taleb ketb ü imlâ olunup yedine def‘ [ve] vaz‘ olundu ki vakt-i hâcetde müzekkir-i mâ-cerâ ola. Tahrîren fi’l-yevmi’r-râbi‘ aşer min-Muharremi’l-harâm li-sene isneteyn ve sittîn ve elf. Şühûdü’l-hâl: Mustafa Halîfe el-Müezzin, Mustafa Çelebi b. Abdi el-Hammâmî, Mehmed Beşe b. Hasan Odabaşı, Receb Beşe b. Ahmed, Ahmed Beşe b. ( ) Tellâk, Mustafa b. Mehmed Muhzır, Mehmed b. Ramazan Muhzır ve gayruhüm.