Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 72 Hüküm no: 37 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avraham v. David’in Dimitri v. Vasil’den satın aldığı bağa Todori, Panayot ve Nikola’nın kefil oldukları Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden olup Senyora cemâ‘atinden işbu râfi‘ü’s-sifr Avraham v. David nâm Yahudi mahfil-i kazâda Dimitri v. Vasil nâm zimmî muvâcehesinde ikrâr ve takrîr-i kelâm edüp karye-i mezbûre bağları sınırı dâhilinde Kasımdulu demekle ma‘rûf mevzi‘de vâki‘ bir tarafı Arslan nâm Yahudinin harâbe bağ yeri ve bir tarafı Kebeci demekle ma‘rûf Ermeni bağı ve bir tarafı Kanelo nâm zimmî tarlası ve bir tarafı vâdi ile mahdûd tahmînen sekiz dönüm mikdârı mülk bağı mezbûr Dimitri’den dört yüz kıt‘a riyâlî guruş-ı kebîre iştirâ ve tesellüm eyledim lâkin bağ-ı mezbûrun derkine kefîl olur kimesne taleb ederim dedikde karye-i mezbûre sükkânından olup işbu meclis-i şer‘de hâzırûn Todori v. Yorgaki ve Panayot v. Yani ve Nikola v. Kostantin nâm zimmîler bağ-ı mezbûrun derkine herbiri emr-i kabûlü hâviye kefâlet-i sahîha-i şer‘iyye ile kefîl olduk dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’l-mezbûr ve sene-i mezkûr. Şühûdü’l-hâl: Şuhûdü’s-sâbıkūn, şuhûdü’s-sâbıkūn.