Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 74 Hüküm no: 40 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Dede b. Cafer’in evinin satılıp Üçüncü Sekbânlar Cemaati’nin ihtiyaçlarına sarf edilmesini vasiyyet ettiğinin tescili Dergâh-ı âlî dâme mahfûfen bi’l-me‘âlî yeniçerilerinden Üçüncü Sekbânlar Cemâati’nin odabaşısı olan Mustafa Odabaşı b. Mehmed nâm kimesnenin meşhûdün-bih âti’l-beyân vechi üzere da‘vâ-yı sahîha-i şer‘iyye ile mesbûk istişhâd-i şer‘î sudûrundan sonra hasm-ı şer‘î-i câhid mahzarında udûl-i ricâlden Mustafa Çelebi b. Süleyman Bey ve Mustafa Halîfe b. Yakub ve diğer Mustafa b. Mehmed el-Müezzin meclis-i şer‘-i hatîr-i lâzımü’t-tevkīrde hâzırûn olup şöyle edâ-yı şehâdet-i şer‘iyye eylediler ki cemâat-i merkūmeden olup bundan akdem müteveffâ olan Hasan Dede b. Cafer sene seb‘a ve hamsîn ve elf Rebî‘ülevvel’inin evâilinde sülüs malından tenfîz-i vesâyâ-yı şer‘iyyesi’çün merkūm Mustafa Odabaşı’yı vasiyy-i muhtâr nasb u ta‘yîn eyleyüp mahmiye-i Galata muzâfâtından kasaba-i Beşiktaş’da Sinanpaşa mahalle[sinde] vâki‘ ma‘lûmü’l-hudûd menziline cümle tevâbi‘ ve levâhıkı ile şevâgilden ârî olduğu hâlde vasiyy-i mârrü’z-zikre teslîm edüp ol dahi tesellüm ve kabz eyledikden sonra şöyle vasiyyet ve şart eyledi ki bi-emri’llâhi te‘âlâ ecel-i mukadder hulûl edüp fevt olduğumda menzil-i merkūm sûk-ı sultânîde bey‘-i men yezîd olunup semen-i misli ile fürûht olundukda hâsıl olan meblağ odabaşı yediyle onu on bir buçuk akçe hesâbı üzere i‘mâl ve istirbâh olunup hâsıl olan ribh ve nemâ oda-i mezbûre cemâati’nin it‘âmına ve sâir mühimmât-ı lâzımesine harc u sarf olunup zikr olunan odanın cemâati bi-isrihim hasbî nâzır olalar deyü vasiyyet [13b] ve ikrâr eyledikde ol dahi vesâyet-i mezbûreyi kabûl ve hizmet-i lâzımesin edâya müteahhid oldu biz bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcebiyle sıhhat-i vesâyet-i merkūmeye hüküm birle bu hurûf ketb olundu. Fî evâili’l-Muharremi’l-harâm li-sene isneteyn ve sittîn ve elf. Şühûdü’l-hâl: Mustafa Beşe b. Mehmed, İbrahim Beşe b. Ahmed, Ebûbekir Beşe b. Ahmed, Ali Beşe b. Sinan, Mustafa b. Receb. Hüseyin Beşe b. İsmail ve gayruhüm.