Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 80 Hüküm no: 50 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Dede b. Cafer’in Üçüncü Sekbanlar Odası’nın ihtiyaçlarına vasiyet ettiği menzilin Mehmed Çelebi b. Hasan’a satıldığı Mahmiye-i Galata muzâfâtından kasaba-i Beşiktaş’da Sinanpaşa mahallesinde vâki‘ lede’l-ahâlî ve’l-cîrân ma‘lûmü’l-hudûd tahtânî üç bâb odayı ve bir sofa ve bir bi’r-i mâ ve kenîfi müştemil mülk menzilin mâliki olan Hasan Dede b. Cafer nâm müteveffâ hâl-i hayâtında ve kemâl-i akl [ü] sıhhatinde târih-i kitâbdan mukaddem sene seb‘a ve hamsîn ve elf Rebî‘ülevvel’inin gurresinde vasiyy-i âti’z-zikre def‘ ve teslîm ve şart edüp ba‘de’l-fevt menzil-i merkūm semen-i misli ile sûk-ı sultânîde müzâyede ve fürûht olunup semeni i‘mâl olundukdan sonra hâsıl olan ribh ve nemâsını Dergâh-ı âlî yeniçerilerinden Üçüncü Sekbânlar odası cemâ‘atinin mühimmât-ı lâzımesine harc ve sarf etmek üzere vasiyy-i muhtâr nasb u ta‘yîn eylediği kasaba-i mezbûre sükkânından Mustafa Halîfe b. Yakub ve diğer Mustafa Çelebi b. Şaban Bey ve yine Mustafa Çelebi b. Mehmed el-Müezzin şehâdetleri ile şer‘an sâbite olan oda-i merkūme odabaşısı fahrü’l-eşbâh Mustafa Odabaşı b. Mehmed mahfil-i kazâda işbu hâfızü’l-kitâb Mehmed Çelebi b. Hasan muvâcehesinde bi’l-vesâye ikrâr u i‘tirâf edüp menzil-i mahdûd-ı mezkûru ba‘de’l-müzâyede yirmi bir bin nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile mezbûr Mehmed Çelebi’ye vesâyet-i mahkiyem hasebiyle bey‘ ve teslîm edüp ol dahi teslîm-i semen-i ma‘dûd ve kabz-ı mebî‘-i mahdûd eyledi ba‘de’l-yevm mülk-i müşterâsıdır keyfe mâ yeşâ ve yehtâr mutasarrıf olsun deyicek gıbbe’t-tasdîki’ş-şer‘î vicâhen sıhhat-i bey‘ u şirâya hüküm birle mâ-hüve’l-vâkı‘ bi’t-taleb ketb olundu. Fi’l-yevmi’s-sâdis aşer mine’l-Muharremi’l-harâm li-sene isneteyn ve sittîn ve elf. Şühûdü’l-hâl: Mustafa Beşe b. Mehmed, İbrahim Beşe b. Ahmed, Ebûbekir Beşe b. Ahmed, Ali Beşe b. Şaban, Mustafa Beşe b. Receb, Hasan Beşe b. İsmail, Osman Beşe b. Ali.