Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 83 Hüküm no: 54 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Kemal’in Rus asıllı cariyesi Gülistan bt. Abdullah’ı azad ettiği Mahmiye-i Galata’ya tâbi‘ kasaba-i Beşiktaş mahallâtından merhûm Sultân Süleyman tâbe serâhû mahallesi sükkânından Ömer b. Kemal nâm kimesne tarafından ıtk-ı âti’l-beyânı ikrâra vekîl olup mezbûru ma‘rifet-i şer‘iyye ile ârifân olan Ali Çelebi b. Ferruh ve Siyavuş b. Abdullah nâm kimesneler şehâdetleri ile şer‘an vekâleti sâbite olan aynü’l-a‘yân Mustafa Bey b. Ahmed el-Yesârî nâm kimesne mahfil-i kazâda müvekkilim mezbûr Ömer’in kendüye rıkkı i‘tirâf eyleyen işbu orta boylu gök gözlü ve açık kaşlı Rusiyyetü’l-asl Gülistan bt. Abdullah nâm câriye muvâcehesinde bi’l-vekâle ikrâr ve takrîr-i kelâm edüp evsâf-ı mezkûre ile mevsûfe olan merkūme Gülistan nâm câriyesini müvekkilim mezbûr Ömer ibtigāen li-vechi’l-kerîm ve beriyyen an-ikābihi’l-elîm i‘tâk ve mülkünden ihrâc ve silk-i harâir-i asliyyîne idrâc eyledi ba‘de’l-yevm mezbûre Gülistan sâir harâir-i asliyyât gibi hürre olup üzerinde hakk-ı velâdan gayrı hak kalmadı dedikde vekîl-i mezbûr Mustafa Bey’in cârî ve sâdır olan ikrârını câriye-i mezbûre talebiyle ketb olunup yedine def‘ olundu. Tahrîren fi’l-yevmi’s-sâbi‘ aşer min-Muharremi’l-harâm li-sene isneteyn ve sittîn ve elf. Şühûdü’l-hâl: Nasûh Efendi el-İmâm, Pîrî <> Halîfe Müezzin, Ahmed Çelebi b. Nasûh, Mustafa Çelebi b. Keyvan el-Yesârî, Mustafa Halîfe b. Yakub, Receb Çelebi b. Nasûh, Mustafa Bey b. Şaban, es-Seyyid Hayreddin b. Mahmud, es-Seyyid Ali b. Hayreddin, Ali Reis b. Halil, Mehmed Beşe b. Ali, Mahmud b. Mustafa, Receb Beşe b. Şaban, Mustafa b. Mehmed Muhzır, Mehmed b. Ramazan ve gayruhüm.