Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 84 Hüküm no: 55 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simoni bt. Yani’nin bağını Yani v. Yorgi’ye sattığı Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinelerinden Simoni bt. Yani nâm Nasrâniye mahfil-i kazâda işbu râfi‘ü’s-sifr Yani v. Yorgi nâm zimmî muvâcehesinde bi-tav‘ihâ ikrâr ve takrîr-i kelâm edüp kasaba-i mezbûre bağları sınırı dâhilinde Karlık nâm mevzi‘de vâki‘ bir tarafı Süleyman Bey nâm bevvâb-ı sultânî bağı ve bir tarafı Osman Efendi bağı ve bir tarafı Cebeciler şurbacısı ( ) nâm kimesnenin harâbe bağ yeri ve bir tarafı Dika nâm zimmî bağı ile mahdûd tahmînen dört dönüm mikdârı mülk bağımı mezbûr Yani’ye iki bin üç yüz nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr iki bin üç yüz akçeyi mezbûr Yani yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden bağ merkūm Yani’nin mülk-i müşterâsı ve hakk-ı sırfıdır keyfe mâ yeşâ ve yehtâr sâir emlâki tasarrufu gibi mutasarrıf olsun dedikde mukırre-i mezbûrenin cârî ve sâdır olan ikrârını merkūm Yani bi’l-müvâcehe tasdîk ve bi’l-müşâfehe tahkīk etmeğin mâ-hüve’l-vâkı‘ bi’t-taleb ketb olundu. Fi’l-yevmi’s-sânî aşer min-Muharremi’l-harâm li-sene isneyn ve sittîn ve elf. Şühûdü’l-hâl: Abdülkerim Çelebi el-İmâm, el-Hâc Mustafa b. Yakub, Halil Çelebi b. Mustafa, Ali Çelebi b. Mehmed, Mustafa Beşe b. Mehmed, Mehmed Çelebi b. Mahmud, Cafer b. Mehmed, Himmet Beşe b. Mahmud, Mehmed b. Ramazan Muhzır ve gayruhüm. Nikola v. Dimo, İskolo v. Yorgi, Anastaş v. Nikola, Yorgaki v. Luka, Andon v. Apostol, Anastaş v. Nikola, Nikola v. Todori. Sahh, sahh. sahh.