Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 92 Hüküm no: 68 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gorki v. Mihal’in Ali Bey b. Kasım Paşa’ya olan borcunun Sinan Reis b. Mehmed’de olan alacağından tahsil edilmesi Deryâ beylerinden emîrü’l-ümerâ’i’l-kirâm Ali Bey b. el-merhûm Kasım Paşa’nın kasaba-i Beşiktaş’da esîrleri üzerinde vardiyânbaşı ve husûs-ı âti’l-beyâna vekîl-i şer‘îsi olup nehc-i mu‘teber-i şer‘î üzere vekâleti sâbite olan işbu râfi‘ü’l-kitâb el-Hâc Ali b. Ahmed mahfil-i kazâda sâbıkā merhûm olan Ali Kapudan nâm kimesnenin vardiyânbaşısı olan Sinan Reis b. Mehmed ve kefere tâifesinden Gorki v. Mihal muvâcehelerinde takrîr-i kelâm ve ta‘bîr ani’l-merâm edüp merkūm Gorki zimmetinde cihet-i kefâletden tâmmü’l-vezn yüz yirmi kantar peksimed bahâsından yüz yirmi guruş hakkına beni havâle-i şer‘iyye ile havâle edüp ben dahi kabûl eyledim [21a] hakīkat-i hâl mezbûrlardan suâl olunup takrîrleri tahrîr olunması matlûbumdur deyicek gıbbe’s-suâl mezbûr Gorki cevâbında fi’l-hakīka hâl minvâl-i muharrer üzeredir mezbûr Ali Bey’e yüz yirmi guruş deynimi merkūm Sinan Reis zimmetinde peksimed bahâsından yüz yirmi guruş hakkıma havâle eyledim dedikde muhtâllün-aleyh Sinan Reis dahi yüz yirmi guruş mersûm Gorki’ye vâcibü’l-edâ deyni olduğunu ikrâr u i‘tirâf edüp mukaddemâ havâleyi kabûl ve vekîl-i mezbûr el-Hâc Ali’ye edâ ve îfâya müte‘ahhid olıcak zikr olunan yüz yirmi guruşu merkūm el-Hâc Ali târih-i kitâbdan seksen gün tamâmına değin haklaşmak üzere te’cîl-i şer‘î ile te’cîl eyledim dediği bi’t-taleb ketb ü terkīm olunup men lehü’t-taleb yedine def‘ ve teslîm olundu ki vakt-i hâcetde ibrâz eyleye. Hurrire fi’l-yevmi’l-hâmis min-Saferi’l-hayr li-sene isneteyn ve sittîn ve elf. Şühûdü’l-hâl: Ali Beşe b. Mahmud, el-Hâc Ahmed b. Yahya, Hasan b. Abdullah, Mustafa [b.] Mahmud.