Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 92 Hüküm no: 67 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Tarantafile’nin arsasını Ali Beşe b. Abdullah’a sattığı Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karye sükkânından Yamandi v. Tarantafile nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ali Beşe b. Abdullah nâm kimesne muvâcehesinde ikrâr ve takrîr-i kelâm edüp karye-i mezbûrede vâki‘ bir tarafı Hasan Ağa mülkü ve bir tarafı Astoratiyoz mülkü ve bir tarafı merkūm Ali Beşe mülkü ve bir tarafı Yehûdâ makberesiyle mahdûd tûlen on beş zirâ‘ ve arzen yedi zirâ‘ mülk arsa-i hâliyemi merkūm Ali Beşe’ye altı yüz nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr altı yüz akçeyi merkūm Ali Beşe yedimden bi’t-tamâm ve’l-kemâl ahz u kabz eyledim ba‘de’l-yevm zikr olunan arsa-i hâliye merkūm Ali Beşe’nin mülk-i müşterâsıdır keyfe mâ yeşâ ve yehtâr mutasarrıf olsun dedikde mukırr-ı mezbûr Yamandi’nin cârî ve sâdır olan ikrârını el-mukarru lehü’l-merkūm Ali Beşe vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Saferi’l-hayr li-sene isneteyn ve sittîn ve elf. Şühûdü’l-hâl: Muslu Beşe b. Mehmed, Hasan Ağa b. Abdülmennan, İsmail Beşe b. Hasan, Mehmed Beşe b. Abdullah, Mustafa b. Mehmed Muhzır, Mehmed b. Ramazan Muhzır.