.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 170
Hüküm no: 121
Orijinal metin no: [30a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Babek v. Avanis ve kardeşi Mıgırdıç’ın İstepan v. Bedros aleyhindeki arazi davasının Sivas mahkemesince karara bağlanması

Sehven buraya kayd olunmuş ise de devletlü Halim Molla Efendi hazretleri zamân-ı aliyyelerinde vukū‘ bulmuş idüğü bu mahalle şerh verildi.

Ma‘rûz,

Sâhib-i arzuhâl Babek ve karındaşı Mıgırdıç veledeyi’l-hâlik Avanis nâm zimmîler Bâb-ı hazret-i fetvâ-penâhîde sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde li-ebeveyn ammileri oğlu derûn-ı arzuhâlde mastûrü’l-ism İstepan v. Bedros nâm zimmî muvâcehesinde Anadolu’da Sivas sancağında vâki‘ Yıldızeli kazâsına tâbi‘ Pirkinik karyesi hudûdu dâhilinde kâin Kör İstepan ve Oseb zimmîler tarlaları ve tarîk-i âm ile mahdûd nısf keyl tohum istî‘âb eder bir kıt‘a tarla babamız hâlik-i mersûm Avanis zimmînin sağlığında ile’l-helâk bâ-tapu taht-ı tasarrufunda olup ba‘de helâkihi tarla-yı mezkûr bizimle diğer er karındaşımız gāib ani’l-beled Oseb zimmîye âdiyen intikāl etmiş iken mesfûr İstepan zimmî zikr olunan tarlayı fuzûlen zabt ve bi-gayr-ı hakkın hırâset ve zirâ‘at etmekle suâl olunup tarla-yı mezkûrdan keff-i yed birle mahâllinde bizimle karındaşım gāib-i mersûma teslîme mersûm İstepan zimmîye tenbîh olunmak matlûbumuzdur deyü ma‘an da‘vâ etdiklerinde, mersûm İstepan zimmî dahi cevâbında tarla-yı mezkûr babam mersûm Bedros zimmîden müntakil bâ-tapu taht-ı tasarrufumda olmağla bi-hakkın vaz‘-ı yed ederim deyü bu sûretde husûs-ı mezkûr arazi nizâ‘ına dâir mevâddan olmağla mahâllinde sâhib-i arz hâzır olduğu hâlde terâfu‘-i şer‘-i şerîf olunmak iktizâ eylediği tarafeyne tefhîm olunduğu tescîl ve huzûr-ı âlîlerine i‘lâm olundu. El-emru li-men-lehü’l-emr.

Hurrire fî 12 Zilka‘deti’ş-şerîfe sene 1256.