Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 169 Hüküm no: 120 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Hıristo ve Biço’nun Berber Bedros aleyhindeki berber gediği ve bostan davasında anlaşma sağlanması Ma‘rûz, Mübârek ve mes‘ûd Rikâb-ı hümâyûn-ı şâhâneye takdîm-i arzuhâl eden Bahçıvan Hıristo v. Biço zimmî meclis-i şer‘-i münîrde derûn-ı arzuhâlde ismi mastûr Berber Bedros v. Panos zimmî muvâcehesinde medîne-i Üsküdar’da Reis mahallesinde vâki‘ hâlik Agob Kalfa Vakfı’nın bi’l-meşrûta mütevellîsi vâkıf-ı mersûmun sulbî kebîr oğlu Mıgırdıç zimmî hâzır olduğu hâlde vakf-ı mezkûr müstagallâtından mahalle-i mezkûrede kâin ma‘lûmü’l-hudûd bir bâb vakıf bostan derûnunda mevcûde beyne’l-esnâf gedik ta‘bîr olunur yine vakf-ı mezkûr müstagallâtından senevî dokuz bin akçe icâre-i müecceleli vakıf âlât-ı lâzıme-i ma‘lûme bâ-temessük-i mütevellî taht-ı tasarrufumda iken bin iki yüz elli senesi şehr-i Ramazani’l-mübâreki’nin on beşinci günü ben âlât-ı gedik-i merkūmu iki bin beş yüz guruş bedel-i makbûz mukābelesinde gāib ani’l-meclis Bahçıvan Yorgi v. Gazar nâm zimmîye ferâğ-ı kat‘î ve re’y-i mütevellî ile ferâğ ve tefvîz ol dahi ba‘de’t-tefevvüz âlât-ı mezkûreyi bin iki yüz elli iki senesi Cumâdelûlâsı’nın yirmi yedinci günü yine gāib ani’l-meclis Taşçı Misayel v. Dimitri nâm zimmîye bâ-re’y-i mütevellî ferâğ ve tefvîz ol dahi tefevvüz ve kabûl etdikden sonra âlât-ı merkūmeyi sene-i mezkûre şehr-i Ramazani’l-mübârekinin on üçüncü günü işbu mersûm Bedros zimmîye bâ-izn-i mütevellî ferâğ ve tefvîz etmekle ol vechile el-yevm âlât-ı gedik-i merkūme vaz‘-ı yed ve bostan-ı mezkûru dahi bâ-temessük-i mütevellî taht-ı icâresinde olmağla cümlesini tasarruf edip âlât-ı mezkûrede benim kat‘an alâkam kalmamış ise de ben sâlifü’l-beyân bin iki yüz elli senesi şehr-i Ramazani’l-mübârekinin on beşinci günü târîhinde âlât-ı mezkûreyi gāib-i mersûm Yorgi zimmînin malından ve yedinden karz aldığım meblağ-ı mezkûr iki bin beş yüz guruş deynim mukābelesinde gāib-i mersûma bâ-re’y-i mütevellî vefâen ferâğ [fâriğ] olmuş idim deyü kat‘iyyen fâriğ olduğumu inkâr ile mersûm Bedros zimmî ile beynimizde münâza‘ât-ı kesîre cereyân etmiş idi. El-hâletü hâzihî bi’l-cümle husûs-ı mezkûre ve ferâğ-ı merkūme ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvîden ben mersûm Bedros zimmînin zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi bostan-ı mezkûr kirâsı olmak üzere benden mutâlebe eylediği bin iki yüz guruşa ve vakf-ı mezkûr musakkafâtından mahalle-i mezkûrede kâin bâ-temessük-i mütevellî bi’l-icâreteyn mutasarrıf olduğu bir bâb odayı müştemil ma‘lûmü’l-hudûd bir bâb vakıf arsadan ifrâz ve bana meccânen ferâğ ve mütevellî-i hâzır-ı mersûm Mıgırdıç zimmî dahi şehriye on beş akçe icâre-i müeccele ile benim tasarrufuma izin verdiği zikr olunan odayı muhtevî terbî‘an altmış zirâ‘ mahalle ve ferâğına ve zikr olunan husûslara ve sâir cemî‘ hukūk-ı şer‘iyyeye müte‘allika âmme-i de‘âvîden kat‘-ı münâza‘a eyledik deyü ikrâr ve tasâdukları tescîl ve huzûr-ı âlîlerine i‘lâm olundu. Fî 24 Ş sene [12]56.