Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 103 Hüküm no: 87 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Tüccar David v. Ağanik’in Tüccar Mehmed b. Ali’de olan alacağının ödenmesi Tüccâr tâifesinden işbu hâfızü’l-kitâb David v. Ağanik nâm Ermeni mahfil-i kazâda tâife-i mezbûreden Mehmed b. Ali nâm kimesne mahzarında üzerine da‘vâ ve takrîr-i kelâm edüp merkūm Mehmed ile târih-i kitâbdan iki sene mukaddem beynimizde nice bey‘ u şirâ ve ahz u i‘tâ vâki‘ olmuşidi. El-hâletü hâzihî hesâb ü kitâb eylediğimizde ba‘de külli hesâb mersûm Mehmed zimmetinde yüz on kıt‘a riyâlî guruş hakkım sudûr ve zuhûr eyledi suâl olunup alıverilmesi matlûbumdur dedikde gıbbe’s-suâl merkūm Mehmed dahi müdde‘î-i mezbûra vech-i muharrer üzere zimmetimde yüz on riyâlî guruş lâzımü’l-edâ ve lâzımü’l-kazâ deynim vardır deyü bi-tav‘ihî ikrâr ile cevâb vericek edâsına tenbîh birle mâ-vaka‘a bi’t-taleb ketb olundu. Fi’l-yevmi’l-hâmis min-şehri Rebî‘i’l-evvel li-sene isneteyn ve sittîn ve elf. Şühûdü’l-hâl: Abdi Dede b. Ali, Mehmed Çelebi b. Ramazan, Mustafa Çelebi b. Mehmed, Cafer b. Mehmed, diğer Mehmed Çelebi el-Muhzır ve gayruhüm.