Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 103 Hüküm no: 88 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lefter’in Filado bt. Kosta’dan satın aldığı bağı kızı Rafire’ye hibe ettiği Mahmiye-i Galata’ya tâbi‘ kasaba-i Beşiktaş’da Sinanpaşa mahallesinde sâkine Filado bt. Kosta nâm Nasrâniye meclis-i şer‘de işbu râfi‘ü’s-sifr Lefter v. ( ) nâm zimmî muvâcehesinde ikrâr ve takrîr-i kelâm edüp kasaba-i mezbûre bağları sınırı dâhilinde Konak demekle ma‘rûf mevzi‘de vâki‘ bir tarafı Hristofoli v. Yamandi bağı ve bir tarafı Corci Nikola bağı ve bir tarafı Darmi ve bir tarafı tarîk-i âm ile mahdûd tahmînen sekiz dönüm mikdârı mülk bağımı cümle tevâbi‘ ve levâhıkı ile merkūm Lefter’e dört bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabûl ve kabz eyledikden sonra semeni olan meblağ-ı merkūm dört bin akçeyi yedinden bi’t-tamâm ve’l-kemâl ahz u kabz eyledim ba‘de’l-yevm mülk-i müşterâsıdır keyfe mâ yeşâ ve yehtâr mutasarrıf olsun deyicek gıbbe’t-tasdîki’ş-şer‘î vicâhen mezbûr Lefter meclis-i mezbûrda ikrâr ve takrîr-i kelâm edüp iştirâ eylediğim mersûm bağı işbu hâzıra bi’l-meclis sulbiye sagīre kızım Rafire’ye hibe-i sahîha-i şer‘iyye ile hibe ve temlîk ve teslîm edüp yine bizzât kendim velâyeten sagīre-i mezbûre Rafire için ittihâb ve kabûl ve kabz eyledim ba‘de’l-yevm sâlifü’z-zikr bağ-ı merkūm merkūme Rafire’nin mülk-i mevhûbudur kat‘â benim alâka ve medhalim yokdur dedikde vâki‘ hâl ketb ü imlâ olunup yed-i tâlibe def‘ olundu. Tahrîren fi’l-yevmi’s-sânî aşer min-şehri Rebî‘i’l-evvel li-sene isneteyn ve sittîn ve elf. Şühûdü’l-hâl: Ahmed Beşe b. Hüseyin, Mustafa Beşe b. Mehmed, Mehmed Çelebi b. Ramazan, Cafer Beşe b. Mehmed, Mehmed Çelebi b. Mahmud, Hristofoli [v.] Yamandi, Yani [v.] Kosta, Dimo [v.] Yani, Yamandi [v.] Kosta, Nikola [v.] Yamandi