|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 170 Hüküm no: 123 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Bahçıvan tâifesinden Astori ve kardeşi Vasil’in alacak davasında anlaşma sağlanması
Hüve
Sudûr-ı i‘zâm-ı me‘âlî-ittisâmdan devletlü inâyetlü übbehetlü Keçecizâde hafîdi Abdülhalim Efendi -edâmallâhu te‘âlâ bi’l-izzi’l-ebedî- hazretlerinin zamân-ı devletlerinde vukū‘-yâfte olan de‘âvî-i şer‘iyye zımnında i‘tâ buyurdukları hücec-i şer‘iyye ve i‘lâmât-ı mer‘iyye ve senedât-ı sâire kuyûdâtıdır. Hurrire fî-gurreti N sene [12]56
Ma‘rûz-ı dâ‘î-i Devlet-i aliyyeleridir ki,
Bahçıvan tâifesinden arzuhâl eden Astori ve karındaşı Vasil veledey-i Dimitri nâm zimmîler Bâb-ı hazret-i fetvâ-penâhîden Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i hatîrde medîne-i Üsküdar’a muzâfe Kādı karyesinde Çınarlıbahçe’de mütemekkin Riso v. Tanaş nâm zimmî muvâcehesinde bizim mersûm Riso zimmî zimmetinde işbu târîh-i i‘lâmdan bir sene mukaddem müşterek malımızdan ve yedimizden ikrâz ve kabz ve umûruna sarfla istihlâk eylediği bin guruş alcak hakkımız olmağla meblağ-ı mezkûru mesfûr Riso zimmîden hâlâ taleb ederim deyü tasaddî eylediğimiz da‘vâmızdan bâ-vesâtet-i muslihîn zimmî-yi mersûm ile bi’t-tav‘ ve’r-rızâ beş yüz guruş bedel-i medfû‘ ve makbûza ba‘de akdi’l-musâlaha ve’l-kabûl mâ‘adâ ziyâde müdde‘âmıza ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. El-emru li-men-lehü’l-emr.
Fi’l-yevmi’s-sâlis ve’l-ışrîn min-şehri Ramazani’l-mübârek li-sene sitte ve hamsîn ve mi’eteyn ve elf.
|